Leh burom ka BJP ia u Kiang Nangbah, kyntu ia ka sorkar ban phaikhmat sha ki longkmie bad samla

Syllad | The Rising MeghalayaDecember 30, 2023

Ka Meghalaya BJP Mahila Morcha bad ka BJYM ki la pynlong ka jingleh burom ha ka lyngkhuh sngi iap ba 161 snem jong u Kiang Nangbah da kaba pynlong ka jingleit buh syntiew hynne ka sngi Saitjain da kaba kyntu ruh ia ki nongshong shnong ban shim ia ki nuksa lyngba une u riewialeh laitluid uba shlur.

Ha ka prokram ba la pynlong ha State Central Library hashwa ka jingbuh syntiew ha u mot dur jong une u khlawait, na ka liang ka president ka Meghalaya BJP Mahila Morcha, ka Kong Sukhi Pariat ka la ong, “Ngi kyrpad ia ka sorkar jylla ba kan pynleit jingmut halor ki jingeh kiba ki riewkynthei ki bym don shuh ia u nongpyndap pynbiang ki iakynduh ha ka jingim jong ki.”

“Ki longkmie ki dei kiba btin lynti sha ka lawei ka imlang sahlang ka jong ngi bad ki dei ban ioh ia baroh ki lad jingkyrshan khnang ban pynthikna ba ngin lah ban tei ia ka lawei ka ban wan bad ka ban pynthikna ia ka imlang sahlang kaba koit ba khiah,” ka la ong shuh shuh.

Nalor kata ka la ong ruh ba ka jingeh kaba iadei bad u drok hapdeng ki khun samla ka la kynrei bha ha ka jylla, bad halor kane baroh ki kynhun ha ka imlang sahlang ki dei ban iatreilang ryngkat ryngkat ban pynthikna ba ki khun samla kin ioh lait na kine ki jait jingdih ba shyrkhei bad ban wanlam pat ia ki sha ka lynti kaba dei bad kaba koit ba khiah. Ka la ong ruh ba ka sorkar ka dei ban phaikhmat halor ki sienjam ban rat dyngkhong ia ka jingduk jingkyrduh.

Hadien kane ka prokram, kane ka kynhun ka la wan sha Motphran bad leh burom ia u Kiang Nangbah da kaba wah ia khiew syntiew ha kane ka jaka.

Ha kane ka jaka ka kong Pariat ka la ong, “Ba u Motphran u dei u mat sahkynmaw ia ki riewshlur jong ka jaidbynriew Khasi kiba la aiti la ka jingim ha France ha ka por jong ka thma bah kaba nyngkong. Ngi kyrpad ia ki nongshong shnong ba kin pynneh pynsah ia ka jingkhuid bad ka jingitynnad jong u Motphran shibynta ban kynmaw burom ia kine ki riewshlur, kata da kaba kiar ruh ban tah ia ki postar ha kane ka jaka.”