Leh burom ka North Liberty HSS iaki san ngut ki samla ba ioh leit pule doktor na ka bhah Sorkar

Syllad | The Rising MeghalayaOctober 16, 2024

Ka North Liberty Higher Secondary School, Jowai ha ka 15 tarik u Risaw ka la ioh ban lehkmen da kaba pynkup burom ia ki san ngut ki samla pule jong kane ka skul kiba la ioh ban leit pule MBBS lyngba ka bhah na ka Sorkar Meghalaya hadien ba ki la pass ia ka NEET Exam.

Kine ki san ngut ki samla ba la shah pynkup burom ki kynthup ia u Wanteibok Pator, uba la pass ia ka NEET Exam da kaba ioh 590 bad u ban leit pule ha Maulana Azad Medical College ha New Delhi; Dauni Therbor Pasi, ba ioh 487 bad leit pule ha G.R. Medical College ha Gwalior, Madhya Pradesh; Chanmi Suchiang ioh 473 bad leit pule ha RIMS, Imphal; Dethiadiem Plain ioh 468 ban leit pule ha Darbhanga Medical College ha Bihar; Wakanirinmanki Shullai ba ioh 386 ban pyniasoh ha NEIGRIHMS, Shillong.

Baroh arngut kiba la aijingkren ha ka jingialang, kata u Wanteibok bad Dauni ki la pyrto ia ka skul bad ki nonghikai kiba la ai ym tang ia ka jingnang jingstad ha ka pule puthi hynrei wat ia ki jinghikai kiba iadei bad ka jinglong jingim kiba ki lah ban pyniaid shakhmat. Ki la kyntu ruh ia ki khynnah pule ba kin long kiba trei shitom bad ban bud ia ka thong ka jingangnud ha ka jingim jong ki da kaba pynpaw ruh ia ka jingdonkam ia ka jingiaishah.

U Wanteibok u la iathuh ba ka jingiaid lynti ka jong ki ka dei kaba bun ki jingeh jingtyngjuh, kynthup ia ka rai kaba eh ban shim hadien ba la pyndep ia ka klas 12 jong ki ban sangeh pule shisnem, kaba ha kaba kut ka long kaba seisoh. U la ban jur ba ka nongrim ba skhem kaba ka skul ka la pynioh ha ki ka la iarap ia ki ban ngeit halor ka jinglah jong ki ban jop.

Ka Dr Helen J Uriah, District Maternal and Child Health Officer kaba dei ruh ka hymmen jong u Principal kane ka skul u Bah Richard Uriah haba aijingkren ha ka jingialang kum ka Kongsan ka la pynpaw halor ki jingeh ha ka liang ka koit ka khiah kaba ki briew ki iakynduh ha ki thain nongkyndong bad wat hapoh sor Jowai, ha kaba bun ki hap ban leit shabar jong ka district na ka bynta ban ioh ia ki lad jingsumar namar ka jingbym biang ki lad aijingsumar ha ka thain. Ka la pynpaw ruh ia ka jingkyrmen ba kan don ka jingsumar kaba kham bha ha ka district ha ki por ban wan.

Ka la ai khublei kyrpang ruh ia kine ki san ngut ki samla pule kiba la trei shitom bad ioh ia ka jingjop hadien ba ki la lah ban pass ia ka NEET Exam. Ka la pynshlur ruh ia kiwei pat ki khynnah skul ba kin beh sha ka thong kaba ki angnud ha ka jingim jong ki, kata la ka long ha ka liang ki lad jingsumar ne kiwei kiwei pat ki bynta kum ha ka lain enjiniar, kam hikai ne kiwei pat ki jingpyntbit ha ka liang ka koit ka khiah.

U Principal jong ka skul ha ka jingkren u la iaroh ia kine ki samla halor ka jingjop ka jong ki da kaba shim ruh ba ka dei ka khyllipmat kaba kmen tam na ka bynta ka skul hi baroh kawei. U la kdew ruh ia ka histori jingjop jong ka skul ha ka Science Stream naduh u snem 2017, da kaba ong ba ka North Liberty ka la bteng ban pynmih ia ki khynnah pule kiba la ioh ban leit pule MBBS lyngba ka bhah na ka Sorkar Jylla. U la pynkynmaw ruh ia u Kamphereiei Pala uba dei u khynnah pule ba nyngkong jong kane ka skul u ban lah ban pass ia ka NEET Exam, bad uba mynta u la pyndep ia ka jingpule napoh Guwahati Medical College bad kylla long u briew ba la burom da ka imlang ka sahlang.

U la ai khublei kyrpang ia ki nonghikai bad ki kmie ki kpa namar ka jingkyrshan radbah ka jong ki da kaba ong, ka jingjop jong ki khynnah skul ka pynapw ia ka jingtrei shitom jong ka skul hi baroh kawei. U pynshlur ruh ia ki khynnah kiba pule ha ki klas 10, 11 bad 12 ba kin pynleit jingmut ha kaba sngewthuh bniah ia ki jingmut ha ka jaka ban shu pass ia ki eksam.

Nalor kata ula iasam ruh ia ka khana kaba ai mynsiem jong u J. Kishore Pradhan u rangbah 64 snem rta u nongtrei bank ba la shongthait uba la pass ia ka NEET Exam, kaba pyni ba kam ju long kaba slem ban beh sha ka thong jong ka jingangnud.

Kumta ruh u la kyntu ia ki khynnah skul ba kin trei shitom bad ban shim man la u snem kum ka kabu kaba khatduh jong ki ban ioh ia ka jingjop, da kaba kdew ruh ba ia ka NEET Exam na ka bynta ki riewlum ka lah ban shah pynduh noh ha u snem 2025.

La pynkut noh ia kane ka jingialang da ka jingiathap kti na ka bynta kine ki san ngut ki khynnah ki ban leit bteng shen ia ki jingpule MBBS ha ryngkat ka jingkyrmen ba ka North Liberty kan nanglah shuh shuh ban pynmih ia kiba kum kine ki khynnah ha ki snem ki ban dang wan.