Leh burom ka WWC Loomkyrwiang Dorbar Chnong ya ka International Women’s Day

Syllad | The Rising MeghalayaMarch 9, 2024

Kam wa datiplang wa ka 8 tarik Wisu khlieh u snem toh ka International Women’s Day nae ka sngi kyrpang ki kynthai kawa da leh burom ha ki rukom ki dur wapher ha kyllein ki ri ka pyrthai, kamtae ka Women’s Welfare Committee iong ka Dorbar chnong Loomkyrwiang leh ha uni u snem da pynman ko ka prokram kyrpang ha Yungwalieh kat kam ka theme wa ong “Invest Women” heiwa ki khon kynthai ka chnong nadooh ki manbei deilang ki khyllood dawan ki wow yachimbynta.

Ha ka yalang wa kyrpang iong kani ka sngi wa da pynlai da ka Samhakani Laloo, Secretary WWC-LDC daioh I ngoohblai ngoohsyiem na ka Riwanki Laloo, Member WWC-LDC neitae I klam pdiang burom na ka Wequeen Najiar, Assistant Secretary, WWC-LDC katwa hei pynkut wan ka Kongka Shullai, Chairperson WWC-LDC da e ko ki kyntien sniawngooh.

Ya kani ka prokram da sakhiang da ka Dr. J.N.Shullai, Director MCSWA kam ka kongsan, ka Dengsuk Laloo, Adviser WWC-LDC kam ka symbood kongsan nalor u Waheh Chnong Ma Lammat-OO Laloo, ki Official ka Loomkyrwiang Dorbar Chnong wa kiwi kiwa cha khut sniawbha.

U Lammat-OO Laloo hawa klam ha kani ka sngi da yaroh u ya ki yahkhmat ka Sein Kynthai kamjooh ya ki dkhot waroh kiwa da ye u pynman ya kani ka prokram kawa em kam bha ha ka Nongrim wow wanrah I yajooh yajan wei sniaw yaman iwi hapyrdi ki khon kynthai ka Dorbar Chnong, wei da kitbok kitrwiang u leh wow nangiohbor iohmynsien chooh ki khon kynthai ka chnong hei wow leh ya ki kam wamiat wabha neibynta ka yung ka sem wa ka imlang sahlang iong waroh ki wa chong chnong.

Ka Dengsuk Laloo hawa e kyntien heiyatoh wa kani ka sngi da e mynsien ko ya ki para kynthai wom hoi u man kiwa dooh jingkyrmen hei jingim han la hap u mad u takhooh chiboon i eh i tynjooh.

Ka Dr.J.N.Shullai, Director MCSWA hawa klam ha kani ka yalang da kdar ko wow khana chaphang ka theme wa ki sub theme iong ka International Women’s Day ha uni u snem wei kyrpang leh da klam yllu ko ya ka bynta wa yatoh wei chait i khiah ki kynthai nae ki manbei.

Chooh chooh da e mynsien ko ya ki khon kynthai wow man kiwa ya tylli wei yakrehlang da ka luti i ya sniawthuh jingngmut khlem da wanrah i sniaw yapher.

Ya kani ka prokram da pynkut da i ah iow Cake da ka Men Sbuh Najiar, kawi na ki manbei wada heh rta pynbood leh kiwi ki prokram pynka-it pynwyrngia hei chimbynta ki manbei wa ki khyllood.