Leh burom u Lat ka Jylla ha ka lyngkhuh sngi iap ba 84 snem jong u Myllung Soso Tham

Syllad | The Rising MeghalayaDecember 19, 2024

U Lat ka Jylla Meghalaya u CH Vijayashankar ha ka 18 tarik Nohprah u la iashim bynta ha ka jingleh burom ia u Myllung bad u riewkhmat ha ka thoh ka tar jong ka jaidbynriew u Soso Tham ha ka lyngkhuh sngi iap kaba 84 snem jong u.

Ha kane ka jingleh burom la wan iashim bynta ruh da ki riew pawkhmat bapher bapher kynthup ia ki riew shemphang ha ka thoh ka tar, ki riew ieid ha ka thoh ka tar ban rakhe kynmaw ia jinglong jingim bad ia ka nam ka burom jong u Soso Tham.

Haba ai jingkren ha ka jingialang ba la pynlong hapoh Raj Bhavan u Lat u la ong ba ki jingnoh synniang jong u Soso Tham ki la buh ia ka dak bym lah pyndam ha ka kolshor bad ka thoh ka tar jong ka jylla Meghalaya.

U la ong ba ki jingtrei jong u Soso Tham kiba pynpaw ia ki riti dustur, ka kolshor bad ki jingangnud jong ka jaidbynriew Khasi ki dang iai bteng ban ai mynsiem ia ki pateng kiba hadien jong u.

U Lat u la pynpaw ruh ia ka jingdonkam ban pynneh pynsah bad kyntiew ia ka riti ka dustur ba riewspah jong ka Jylla, da kaba ban jur ba ki kam jong kum kine ki riew khraw ki dei ban iai bteng ban ialam bad saindur ia ka pateng ka ban wan.

Ha kane ka sngi la pyni ruh ia ki prokram kiba iadei bad ka kolshor kiba kynthup ia ki jingiashim bynta ba la pynshong nongrim na ki poetry jong u Soso Tham kaba pynim ia ka pateng ka thoh ka tar ka jong u.

Kane ka jingrakhe ia ka lyngkhuh sngi iap kaba 84 snem jong u Soso Tham ka long ka por kaba kongsan ban pyrkhat halor ki jingnoh synniang ki jong u bad ban pynskhem biang ia ka jingangnud jong ka Jylla ban pynneh pynsah ia ka jinglong kyrpang jong ka kolshor.