Leh klet ka sorkar iaka ktem pulit ba pahara ia u pud u sam ka Jylla Meghalaya

Syllad | The Rising MeghalayaJuly 14, 2021

Ka ktem jong ki pulit battalion jong ka sorkar Meghalaya kaba don haka shnong Khanduli, West Jaintia Hills ka dang neh sah kum ka iing ba shipor, katba ka sorkar Assam pat kala nang nang pynkhlain bad pynbiang iaki Border Police Outpost jong ka.

Kane ka ktem pulit battalion ha Khanduli la buh haka por ba dang jur bha ka jingiakynad halor u pud u sam bad kumjuh ka jingdawa pisa ka kynhun kieng atiar na Karbi Anglong, Assam na ki paid Khasi Pnar, phewse kane ka ktem ki shipai battalion kala neh sah kumjuh kum kita ki iing shipor bad shah leh klet naduh ki sorkar ba mynshuwa haduh kaba mynta.

La shna ia kine ki iing sah ki shipai battalion tang da ki skhen ki siej, ki tin sopiing kiba la jot rathai bad khlem maramot bad ka madan ruh kaba dang sabor da ka khyndew.

Ki ar ngut ki MDC ba kynthup ia u Aibor Shadap MDC Barato bad u Dawan Lyngdoh MDC Mynsngat Khanduli kila hair sha katei ka jaka haka sngi Nyngkong haka jingsynrang lang ki nongïalam shnong ka Khanduli bad kiwei ki nongïalam shnong.

U MDC ka Barato ula ong kila ioh ka jingujor na ki nongshong shnong ba katei ka ktem Pulit battalion ka la shah lehklet ha ka sorkar watla ki dei ki nongiada ia u paid nongshong shnong bad ia u pud u sam ka Jylla Meghalaya.

KIne ki ar ngut ki MDC kila pynpaw ka jingbynniaw bad kim poi pyrkhat ba kane ka ktem pulit kan long tang kum ka iing shipor. Ha kane ka jingjurip jong kila lap ba kane ka ktem ki pulit battalion kala donkam kyrkieh ban shna iaka iing kaba paka namar bala jot rathai ki tin sopiing bad haba slap ba phria ka jaw um lut, nalor ki ïing ruh la shu shna ki siej ki skhen.

“Kumno kine ki Pulit kin ai jingiada ia u paidbah haba tang iaki ruh ka jaka sah jaka shong jong ki kam long kaba shngain bad ki karma shet, ki kamra thiah jong ki ruh la syrdep da ki plastic nalor ba rukom shna ruh la kum ka iing sher dara kaba shisngi,” la ong u Aibor bad ula bynrap ba ka surok ban rung sha kane ka jaka ruh kaba ym lait kali haba slap ba ktieh.

U Dawan Lyngdoh ula ong kine ki pulit battalion haka jaka ba kin ïada ïaki paidbah kin hap ban ïada ïalade na u slap, u phria bad ka lyer. Ula ong ruh ba haba peit iaka jinglong jingman kane ka iing sah ki pulit battalion ka tnad Pulit kum juh ka sorkar kala shu iehbein shaba palat ia kine ki pulti battalion kiba don ka bynta kaba hakhmat eh ban iada ia u pud u sam ka jylla.

Kine ki ar ngut ki MDC kila dawa na ka tnad kam pohiing kumjuh naka sorkar ban shna noh mardor iaka iingsah kaba paka ia kine ki shipai ba kin shngain ka rukom shong sah jong ki, khnang ba kin lah ruh ban ai ka jingshakri ia u paidbah.