LEH NIAM KNIA PYRTHAT

Soolangki LalooJune 28, 2020

Knia Pyrthat, lehniam wa kyrpang kyntang
Soo raij- Soo langdoh chirup deilang.
Ha Raij Jwai yei lehniam da pyndep
Hei mon I khe u kynrad iow kyllep u sdep.

Chisien chisnem man i
Chwa wow poi ki Le yaw Soo Sngi.
Yein I ngooh I Dem, I lehniam I knia
Iow imsuk imsain u Niaw-wasa.

Langdoh ri Blai, Kam niam wa pyndep
Sdang Dei Chet ya ki Tpu niam nadooh I step.
Chwa wow mih Li knia na Yung Langdoh
Dei peit tpu wa ya  sakhilang waroh.

Wasan wow khoh wakit ha ryngkhi
E wyrta Chula tymbut luti.
Iow tip u bna ki khon ka Raij ka Chnong
U ya wanlang wan bi ha Loomkyndong.

Tympang u peit ya ka Duwan knia
Tyngkong tymbet wa pynyein wa chna.
Kyntang I man sa ki tiar knia hajrong
Ioosuk u peit, rukom pynthiah pynchong.

Bynta wa khatdooh iongka
Da pyndep ha Madan sam sla.
Khon ka Raij ka Chnong wa yawanlang
Khynnah waheh, khmat chynrang.

Chwa wow yapra na Madan Sam sla
 Le Raij- Le Langdoh waioh bhah ioh bynta.
Cha Raij Cha chnong ioh ki u rah
Sarsuk u Sam jiar jiar I bhah.

Iow tyngkhein ya ki Kam niam ha Kani ka sngi
Yutang yubat arliag em I.
Hapyrdi u Doloi wow Kongwasan Chyrmang
Yein pynap pynsniaw hakhap u waboon walang.

Sarin ka lehniam Knia Pyrthat kamni
Malum mala e o haphi.
Kam wow kdar luti yei thij I pyrkhat iongphi
Kat Ki Lok wa purae yeini I sur poitri.