Lehkmen 50 snem ka Moosalyngkat da kaba buh maw nongrim iaka iing dorbar

Syllad | The Rising MeghalayaOctober 21, 2020

Ka Moosalyngkat Dorbar Chnong kala jam sha u mawmer jong ka jingiaid lynti ba 50 snem (1970-2020) haka sngi ba Ar.

Ban lehkmen ia kane ka jingïaid lynti kaba 50 snem (Golden Jubilee) ka dobar chnong kala buh da u mawnongrim iaka Community cum Indoor Sports Hall.

U kongsan ha kane sngi u dei u Dolloi ka Elaka Jowai u Ma Puramon Kynjing, u symbud kongsan u Prof. PM. Passah nalor ki dkhot ka Executive Committee Shnong, ki longkmie longkpa, ki samla bad kiba shah khot sngewbha. Iaka jingïalang la pynïaid da u Ambrose Gatphoh bad ki kyntien pdiang burom na u Waheh Shnong u R Tariang.

Khyndiat shaphang ka khana lyngkot jong ka Moosalyngkat, la sdang ïaka lyngba ka Street Light Committee hapoh ka jïnglam khmat u (L) Rev L. Gatphoh ïaki briew kiba shong ha Kynruh Saphlang, Moosalyngkat, Umsacham.

Ka jingpyrkhat kaba mih na utei u rangbah kumjuh ki longkpa longkmie ïaka jingdonkam ka street light khnang ban shngaiñ ka leit ka wan ki briew khamtam kiba shong basah hapoh ka dong bad ha u snem 1970 la thaw ïaka Moosalyngkat Local Committee.

Ka Moosalyngkat ka don ruh ïaka riti treikam (Constitution) naduh u snem 1972 bad ka la ïasoh bad ka Jowai Town Committee ha u snem 1971.

Ha u snem 1974 ka ophis Registrar of Society Act ka la register ïaka Moosalyngkat Local Committee (Register Under Societies Registration Act XXI ofl 860 vide No SR/MLC- 3/74 OF1974).

Haka 29 tarik Jylliew 2016 ka Moosalyngkat ka la ïoh ïaka NOC na ka Ladthadlaboh Dorbar Shnong ban ithuh noh ïaka kum ka Dorbar Shnong bad ïa kane ka kam la pyndep ha ïing skul ka Ladthadlaboh haka jingïadon lang u Dalloi Elaka Jowai u Puramon Kynjing.

Haka 10 tarik Nailur 2016 u Dalloi u Puramon Kynjing ula pynskhem Waheh Shnong ïa u Ricky Tariang bad ïaka sanad jong ka Shnong Moosalyngkat la pynbna haka  22.05.2019 kaba sdang naka  12.12.2018 haduh 12.12.2020.

Ha kaba ïadei bad ka Community Hall, la iathuh ba la pynïeng ïaki païa ka iing dorbar haka 05.03.2016 lyngba ka jingkyrshan pisa ki nongmihkhmat ba kynthup ia u Prof RC. Laloo MLA, Kong Wansuk Syiem MP Rajya Sabha, VH Pala MP Lok Sabha, JU Nongrum, Moonlight Pariat MDC barim, Andrew Shullai MDC.

La pynphuh pynphieng ïa katei ka sngi da ki jingrwai bad jingshad naki khun samla ka Shnong.