Lehkmen 78th Independence Day ka shnong Loomkyrwiang

Syllad | The Rising MeghalayaAugust 16, 2024

Ha ryngkat bad ka ri baroh kawei, ka Loomkyrwiang Dorbar Shnong ruh haka 15 tarik Nailar kala lehkmen iaka Independence Day ba 78 ha kaba ki nongshong shnong naduh khynnah haduh kiba la san kila wan ban iashim bynta.

Iaka lama lai rong ka ri, la pynher da u Bah Lammat oo Laloo, Waheh Chnong Loomkyrwiang ryngkat ka jingrwai iaka National Anthem.

U Bah Daioolang Pakma, Symbud Waheh Chnong haba pyniaid iaka jingialang ula pynkynmaw iaka jingioh laitluid ka ri bad kyrpang ruh ia u Woh Kiang Nangbah khlawait ka Ri Jaintia uba la aiti iala ka jingim na ka bynta ka ri bad ka jaitbynriew ha u tyllai phasi ban iakhun pyrshah iaka Sorkar Phareng.

U Bah Lammat OO Laloo, haka jingkren ula kyntu iaki nongshong shnong ban long ki briew kiba tip ban burom kylliang wat hapdeng ka jingiapher ha kiba bun ki rukom.

Ha kane ka sngi na ka liang ka Khynroo Khyllood Committee kala sam ruh iaki khusnam sha ki nongjop haka jingiakop Drawing-Painting Competition. Haka rta hapoh 9 snem ki nongjop ki long ka Riheiburom Shullai, Elmonzavivian Laloo bad ka Iarisa-I-Haka Lywait katba haka rta 10 snem shaneng ki long ka Nangroi Laloo, Ove Elford Laloo, Arphiwansa Laloo bad ka Charrisa Man-Ka Pakma.

Kaba kham kyrpang ha kane ka sngi, shwa ban ioh ki kyntien sngewbguh na u Lewansa O Laloo, Secretary KKC naka liang ka Dorbar Chnong kala pynkhreh iaka Independence Day Pledge ne ki kyntien kular kum ka jingai mynsiem ia baroh ki khun ka Dorbar Chnong ha ka thong ban wanrah iaka jingshong suk shong sain, ka bha ka miat ka imlang sahlang bad Tipbriew-Tipblei.