Lehkmen advance Christmas ka JHDS bad ki khynnah ba duk

Syllad | The Rising MeghalayaDecember 20, 2022

Ka Jaintia Hills Development Society (JHDS) sa shisien pat ka la pynlong ia ka prokram lehkmen advance Christmas ryngkat bad ki khynnah kiba wan na ka longing baduk. Ia kane ka prokram la pynlong ha ka ophis treikam ka JHDS kaba don ha Lumbihsyntu, Mihmyntdu West Jaintia Hills District.

Ia ka jingialang la pyniaid da ka Kong Mandakini Nongtdu, Center Coordinator Childline ha ka jingiadonlang u Director ka JHDS u Fr. Manbha Pakem, U Coordinator ka JHDS u Bah Denis Kurkalang nalor ki staff bad ki dkhot ka JHDS.

U Fr. Manbha Pakem u la sam iaka Khubor Chrismas ban pdiang ia ka jingwanlong briew u Nongpynim U Trai Jisu Krist. U la ong ba ka Christmas ka wanrah ia ka khubor jong ka jingieid, jingkmen, jingkyrmen, jingsuk bad jingiaburom markylliang bad kaba kham kyrpang kalong ban lehisynei ia ki briew kiba donkam jingiarap. Haba kren shuh shuh u la kyntu ia ki kmie ki kpa, ki nongsumar ba kin sumar hok ia ki khun lada don kino kino kiba shah lehbien bad duh ia ki hok jongki ba kin wan sha ka jaka treikam ka JHDS ba kan pynioh jingiarap katba lah ka bor.

Hadien ba la sam ia ka khubor la don ka jingot Cake bad jingiabamja lang, kumjuh ruh la sam ruh ia ki jingai sngewbha Christmas sha kine ki khynnah bashem shitom da ki sopti bad ki tiar ban pyndonkam ha ki jingpule jong ki.

Kum ban shu pynkynmaw ka Jaintia Hills Development Society (JHDS) ka la iarap ban pynleit skul ei ia 80 ngut ki khynnah kiba kyrduh kiba naduh klas I haduh Klass XII da kaba pynlut pynsep ia baroh ki jingdonkam ha skul.

La pynphuh pynphieng ia kane ka lehkmen da ka jingshad bad jingrwai ba la ai da ki Staff ka JHDS ryngkat bad katto katne ki khynnah kiba wan sha ka prokram.