Lehkmen Christmas ka JHDS bad ki khynnah na ki longïing ba duna ka ioh ka kot

Syllad | The Rising MeghalayaDecember 23, 2023

Ka Khristmas ka dei ka aiom kaba kyrpang ia ki Kristan ha kaba ki kynmaw ia ka jingwan longbriew u Jisu Krist sha kane ka pyrthei. Kum ka dak ka jinglekmen ha kum kane ka aiom, sa shisien pat ka Jaintia Hills Development Society (JHDS) ryngkat ka jingiatreilang bad ka Khublei Germany ka la pynlong ia ka prokram lehkmen Krismas bad ki khynnah kiba wan na ka longing baduk.

Ia kane ka prokram la pynlong ha ka Ophis treikam jong ka JHDS kaba don ha Lumbihsyntu, Mimyntdu West Jaintia Hills District ha ka 22 tarik u Nohprah 2023.

Kumban shu pynkynmaw, ka JHDS ryngkat bad ka Jingiatreilang bad ka Khublei Germany ki la ai jingiarap ia ki khynnah kiba don jingduna ha ka ioh ka kot da kaba pynshongskul ei naduh class I haduh class XII, bad mynta u snem ki la don haduh 134 ngut ki khynnah kiba ioh jingmyntoi na kitei ki ar tylli ki Seng.

Ia ka prokram ha kane ka sngi la pyniaid da u Bah Denis Kurkalang, Coordinator ka JHDS ha ka jingiadonlang u Director ka JHDS u Fr. Manbha Pakem nalor ki staff bad ki dkhot ka JHDS. Hadien ka jingialang ba lyngkot la don ruh ka jingot ia u Cake Christmas bad sam ruh ia ki jingai sngewbha sha ki 134 ngut ki khynnah kiba wan na ka longing baduk.

Ha ka bakut jong ka prokram la ioh ruh ia ka jingrwai pynbyrngia da u Kaitor bapawnam ka Jylla u Bah Banker Kharkongor.