Lehkmen Christmas ka Khliehriat Bar Association bad ki briew kiba kyrpang

Syllad | The Rising MeghalayaDecember 21, 2021

Ka Synjuk jong ki Muktiar hapoh ka lama jong ka Khliehriat Bar Association (KBA), kala pynlong iaka prokram lehkmen advance Christmas ryngkat bad ki briew kiba don ka sap kaba kyrpang ha jaka treikam ka Ephphatha Society ha Ieng Swer Memorial English School, Dkhiah West haka sngi Nyngkong.

Ia ka jingialang la pyniaid da u President ka Ephphatha Society haka jingiadonlang u president ka KBA u Kerlang Ksoo nalor ki dkhot ka Ephphatha Society bad ki dkhot ka KBA.

U Ma Kerlang Ksoo ula sam iaka khubor Christmas ban ban pdiang ia ka jingwanlong briew u Nongpynim U Trai Jisu. Ula ong ba Christmas ka wanrah iaka iaka khubor jong ka jingieit, jingkmen, jingkyrmen, jingsuk bad jingburom para briew bad kaba kham kyrpang kalong naka bynta ki briew kiba don ka jingduna haka bor met.

Haba kren shuh shuh ula kyntu iaki kmie ki kpa, ki nongsumar ba kin sumar hok ia ki bad lada don kino kino kiba shah lehbein bad duh iaka hok ba kin wan sha ka jaka treikam ka KBA ba kan pynioh iaki lad jingiarap lyngba ka RPWD Act.

Hadien bala sam iaka khubor la don ka jingdihsha bad ot cake bad air uh iaki jingai sngewbha Christmas sha kine ki briew kiba don jingduna haka bor met kiba kynthup iaki khynnah da ki jain syiad bad ka song pisa. Ka KBA kala synniang ruh da ka pisa sha ka Ephphatha Society kaba la mih ban treimon sngewbha na ka bynta ki briew kiba kyrpang.

La pynphuh pynphieng ia kane ka lehkmen da kaba pynriam iaki light Christmas ryngkat ka jingrwai kyrpang na u Waiphangmi Bareh na ka shnong Khliehriat bad na u Kermiki Siangshai na ka shnong Moolamanoh kiba don jingduna haka bor iohi.