Lehkmen ka Khynroo Khyllood Chilliangraij Niamtre Committee ïaka lyngkhuh snem ba 10

Syllad | The Rising MeghalayaSeptember 27, 2022

Ka Khynroo Khyllood Chilliangraij Niamtre Committee haka 25 tarik une u bnai kala rakhe iaka lyngkhuh snem ba 10 jong ka jingiaid lynti jong ka ban hikai ïaka jingtip niam hapdeng ki khun ka Niamtre.

La pynlong ia ka prokram ha iungwalieh ka Chilliangraij kaba la wan sakhi da ki khun jong ka Niamtre na kylleng.

Haka jingïalang kaba iphuh iphieng, ka Sahakawan Dkhar ka la ai ki kyntien pdiang burom, u Boodwanmi Dkhar ula ai kyntien nguhblei nguhsyiem bad pashat ruh ki kyntien ai mynsiem ïaki khun ka ñiamtre ha kum kane ka sngi.

Ka Chanlang Pde, Chairperson KKCNC ka la pynsngew ïaka Report kyllum katba u Damehiwot Pde Waheh Shnong Chlliangraij ula ai ki kyntien sneng kyntien kraw ïaki khun ka Ñiamtre.

U Arwotki Sumer, General Secretary Seiñraij kum u kongsan bad u Sniawbhalang Rangad kum u symbud kongsan haka jingkren ki la ïaroh ïaka Khynroo Khyllood Chilliangraij Ñiamtre Committee kaba la ïohi jngai ïaka jingbha jingmiat ki khun ka niamtre.

U Arwotki Sumer kum u nongïalam ka Seinraij Jowai, u khia pyrkhat ban ïohi ba kat nangleit ki sngi ki por ki khun ka ñiamtre ki la nang ringsdot ringswai bad kumba long mynta la don tang 11 percent bad ha lyndet kane la mih u dak jingkylli uba ong, balei sha kylla ki khun ka ñiamtre sha kiwei ki niam?.

Ha kane ka jinglehkmen la pynshong shit da ki jingshad bad ki jingrwai sur tynrai ba la shim bynta da ki dong ba kynthup ka Loomiongkjam, Panaliar, Loompyrdi Iongpiah, Khynroo khyllood Committee Seiñraij Jowai, Shlem Hikai Tynre Seiñraij bad ka Seiñtyllilang Ñiamtre Ladthadlaboh.

Ka la don ruh ka jingsam khusnam shaki nongjop jong ka jingïakop nguhblei, ka jingïakop kyntip (Quiz competition) bad Dat mawpoin.

La pynkup burom kyrpang ruh ïaka Chanlang Pde, ka Samum Pde, ka Emhi Pde bad u Lakhon Dkhar kiba la ïarap ïaka KKCNC da ka Muhor ka Kynthiar bad ïa kane ka bynta la pyndep da u kongsan, symbud kongsan, ka Langdoh Raij Jowai bad u Waheh Shnong Chilliangraij.