Lehkmen ka USTM ba ai jingmynjur ka NMC ia ka PIMC; ha ka kyrteng u Dr Donkupar yn pynkha ia ka Dental College

Syllad | The Rising MeghalayaOctober 26, 2024

Ka University of Science & Technology, Meghalaya (USTM) ha ka 26 tarik u Risaw ka la pynlong da ka jinglehkmen ba kyrpang kum ka dak ka jingai jingmynjur jong ka National Medical Commission (NMC) ia ka PA Sangma International Medical College & Hospital (PIMC).

Ha kane ka prokram lehkmen la ia don lang ruh u Myntri Rangbah ka Jylla u Conrad K Sangma, ka Soradini K Sangma ka kurim jong u (L) PA Sangma bad kmie u Conrad, Myntri ka Tnad ka koit ka khiah ka Dr Ampareen Lyngdoh, Myntri kam Bording u AT Mondal, Balajied Kupar Synrem MLA Shella, u Chancellor, USTM u Mahbubul Hoque bad kiwei kiwei.

Ha kane ka sngi u Chancellor ka USTM ha ka jingkren u la pynbna ruh ban pynkha sa ia ka Dental College ia kaba yn ai nam ha ka kyrteng jong u Myntri Rangbah barim ka Jylla u Dr Donkupar Roy.

Haba kren ha ka jingialang u Myntri Rangbah u la ai khublei ia ka USTM halor kane ka jingjop bad pynpaw ruh ka jingsngewnguh ia u JP Nadda Myntri ka Tnat ka koit ka khiah ka Sorkar Pdeng bad ia ki heh jong ka Tnad halor ka jingkyrshan bad ka jingiarap ka jong ki na ka bynta ban aijingmynjur ia ka Medical College kba 150 seat ka PIMC.

“Nga la don bynta lang ha u snem 2008 ha ka por ba la mynjur ia ka USTM Bill bad kane ka USTM kaba mynta ka dei ka sakhi jong ka jingiatreilang kum ka kynhun, ka jinglong kordor bad  jinglong nongialam,” u la ong.

U la ong ruh, “U PA Sangma u ngeit ba ki jingpynlut pynsep bad ki jingkyrshan na ka bynta ki samla ka dei ka jingkyrshan kaba khraw tam kaba ka sorkar ka lah ban leh na ka bynta ki samla namar u soh lyngba kane ka jingkyrshan ka long ka bym don pud.” 

Nalor kata u la ong ba ka jngim jong ki nongialam ba khraw kum u Late PA Sangma, Late Dr Donkupar Roy bad kiwei pat ki dei kiba ai mynsiem namar ki ieng rangbah hapdeng shibun ki jingeh jong ka jingim.

Haba pynkynmaw ia ki por samla jong u Late PA Sangma ia kaba u la iohsngw na ka kmie jong u, u Conrad u la ong, “Ka jingim jong ki briew kum u PA Sangma bad u Dr Donkupar Roy ka lah ban aimynsiem shikatdei  ia kane ka pateng kaba mynta bad ka long kaba donkam ia ki samla kane ka pateng ba ym tang ba kin kynmaw ia ki matti jong ki hynrei ban shim ia ki jinghikai ba kordor lyngba ka jingim ba sngewrit jong ki bad halor ki nongrim ba kine ki nongialam ki ieng.”

Yn sdang noh ka jingpule doktor MBBS ha PA Sangma International Medical College

“Ka Sorkar ka ngeit ba ka jingpynim wat tang ia kawei ka mynsiem ka long kaba kongsan bad ban ai ia ka jingshakri ba kongsan ha ka koit ka khiah ka long kaba donkam bha, namar kata ka jingmang pisa sha ka Tnad ka koit ka khiah ha ka Jylla ka long kaba heh bad kaba la pynlong ia ka ka jingmang pisa kaba heh tam ha ka ri,” u la bynrap.

La pynphuh pynphieng ia kane ka sngi lyngba ki jingrwai bad jingshad tynrai na ki samla pule ka skulbah.