Lehkmen ka USTM ba ioh rung lai sien kynthih ha ka thup ki 200 tylli ki skulbah ba paw jong ka Ri

Syllad | The Rising MeghalayaAugust 14, 2024

Ka University of Science and Technology Meghalaya (USTM) ha ka sien ba 3 snem kynthih ka la ioh ban rung biang hapdeng ki 200 tylli ki Skulbah kiba bha tam jong ka ri India ha ka jingpynbna kaba khyndai jong ka National Institutional Ranking Framework (NIRF) 2024 kaba la pynbna ha ka 12 tarik mynta u bnai da u Myntri ka tnat Pule puthi ka Sorkar Pdeng u Dharmendra Pradhan.

Kum shibynta ban lehkmen halor kane ka jingjop, ki samla pule ki nonghikai bad kiwei kiwei kila lum lang ha Central Auditorium jong ka USTM haka 13 tarik Nailar.

La iadonlang u Mahbubul Hoque, Chancellor, u Prof GD Sharma, Vice Chancellor, bad u Dr BK Das, u Pro Vice Chancellor ka USTM, Padma Shri Dr Sarbeswar Sahariah, Pro Vice Chancellor ka USTM, u Dr RK Sharma, Advisor USTM, u Prof BK Das, Principal, PIMC, u Prof RK Sharma, Principal ka IAMC, u Dr Rashna Dass Hazarika, Medical Superintendent, PIMC, ka Anju Hazarika, u Registrar ka USTM bad kiwei kiwei.

Haba kren haka jingialang u Chancellor M Hoque u la ong, “Mynta ka sngi ngi sngew sarong ia kane ka NIRF Ranking jong ka USTM. Nga ai khublei ia baroh ki samla pule, ki nonghikai bad ki nongtrei kiba la noh synniang ban pynurlong ia kane.”

Ka USTM ka dei tang maka kaba la ioh ia kane ka kyrdan kiba bha tam na ki 200 tylli ki skul bah haka thain shatei lam mihngi. Ia kane ka kyrdan la pynmih man u snem katkum ka jingshim jingkhein iaki jaka pule ba kham halor ha India katkum ki jingthew ha kaba la buh kyrdan ia ki jaka pule ki long ka jinghikai bad ki lad jingiarap, ka jingwad bniah bad ka jingtreikam ba kyrpang bad kiwei kiwei.

Ka USTM ka dei ka skulbah kaba la ioh ia ka accreditation “A Grade” hadien ka jingbishar bniah da ka NAAC ha u snem 2021. La ithuh ruh ïa katei ka skulbah kum ka Green Campus, kaba dei ruh kawei na ki jingangnud ba hakhmat eh jong ka NAAC, kum ka kynhun jong ka Ministry of Education, ka Sorkar India.

Kane ka skulbah ka la trei khlem sangeh ban pynurlong ia ka thong jong ka ban long kum kawei na ki jaka pule kaba pawkhmat ha ka pyrthei. Ka la wanrah ia ka Pay Back Policy kaba kyrpang ban pynshlur ia ki samla pule ban pyndep ia ka NET, GATE, SLET, IAS, lane kino kino ki eksam ba hakhliehduh ba la pynlong da ka Sorkar Jylla bad sorkar Pdeng. Hapoh kane ka polisi, ki samla pule jong ka USTM kiba pass ia kine ki eksam ki ioh biang ia ka bai lut jong ki na katei ka skulbah.