Leit ai jingïarap ka JHDS sha ki lanot shah shoh phria ha Lapangap

Syllad | The Rising MeghalayaMarch 5, 2020

Ka Jaintia Hills Development Society (JHDS) ka seng trei mon sngewbha hapoh ka Balang Katholik kaba peit iaka bha ka miat jong ka imlang sahlang ka la hiar sha ka shnong Lapangap kaba don ha khappud jong ka Jylla Assam bad Meghalaya ban synniang jingïarap da ki tin sopïing sha ki lanot shah shoh phria haka sngi Palei.

Kine ki lanot shah shoh phria ki don haduh 50 ïing bad na ka liang ka JHDS kala ai jingïarap haduh 43 ban ki tin sopïing sha kitei ki lanot.

Kane ka jingther phria kala jia haka 23 tarik u Rymphang 2020 ha katei ka shnong kaba la ïoh mad ïa u slap ba nyngkong ha ryngkat u phria uba la pynjulor ïaki iing ki sem bad ki jingthung jingtep kiba dang khie lung.

U Phadar Manbha Pakem, Director Jaintia Hills Development Society (JHDS) haka jingkren ula ong ba watla ka JHDS kadei ka tnad treikam jong ka Balang Katholik hynrei ka kner ki kti ban ïarap ia baroh kiba donkam ka jingiarap katkum ka jingkot bor jong ka. Ula iathuh ba na ka liang ka Society ka la ialeh katba lah ban pynioh iaki tin sop iing sha kito ki longiing kiba la shah pynjulor ki tnum iing haka jinghap jong u phria.

U Phadar Pakem ula kyntu ia kito ki longiing kiba ym shem la ioh jingiarap ba kim dei ban sngewpher bad ka society haka bor kaba rit ka la ialeh ban synniang jingiarap khamtam sha kito kiba la jur ka jingshah ktah.

Ula pynpaw ba lada long kaba lah, ka Society ka kwah ban iarap ha baroh ki bynta kiba ki briew ki donkam jingiarap hynrei ka lad kam shah ban leh kumta bad ula kyntu iaki 50 tylli ki longiing kiba la ioh pdiang iaki jingiarap ban pdiang hun ia kine ki jingai barit.

Ka Dorbar Shnong Lapangap ka la pynpaw ka jingsngewnguh kaba khraw ia ka JHDS bad u Phadar Manbha Pakem uba la kloi ban theh ki jingkyrkhu sha ki longiing ka shnong Lapangap.

U Waheh Shnong u Bah Deimonmi Lyngdoh ula ong kane ka jingleh bha jong u Phadar Pakem kan sah khana ka ban sha jingkynmaw pateng la pateng bad ha kajuh ka por la kitbok kitrwiang ia u phadar ba un ioh ka met kaba koit ba khia ban yn nang lah ban ïalam ïaka JHDS ban kan kiew na uwei u mawjam sha u wei pat ha ki kam ki jam jong ka.

Shuwa ban sam ïa kine ki tin sopïing la pynlong ka jingïalang kaba lyngkot kaba pynïaid da u Tellme Dkhar ha iing dorbar ka shnong Lapangap haka jingiadonlang u MDC ka Mynsngat-Khanduli u Dawan Lyngdoh, ki nongialam shnong, ki nongshnong shnong kynthup naduh ki longkmie longkpa ki samla bad ki khynnah rit.