Leit ïakynduh DC Jowai ki san sengbhalang halor ka jingkiew dor ka bai kali bad Umphniang

Syllad | The Rising MeghalayaFebruary 15, 2021

Namar ka jingkiew dor ka bai kali kamai bad ka bai Umphniang kali, ki san sengbhalang ba kynthup ïaka Jaintia Youth Federation (JYF), Meghalaya People’s United Front (MPUF), Jaiñitia Student Movement (JSM), Jaintia Student Union (JSU) bad Hynniewtrep Youth Council (HYC) ki la ïakynduh ïa u Deputy Commissioner ka West Jaintia Hills District u Garod LSN Dykes haka kamra treikam jong u haka sngi Nyngkong.

Ha kane ka jingïakynduh bad u DC ki san seng ki la aiti ïaka jingthoh kaba dawa ban pynhiar ïaka dor jong ka Umphniang kali bad ban wad ki lad ki lynti kumno ban pynhiar ïaka dor bai kali namar ba ka la ktah shisha ïa u duk u rangli uba shaniah haki kali kamai.

Ym tang kata ka ktah khamtam ruh ïaki kmie ki kpa jong ki khynnah skul kiba hap phah skul ïaki khun man ka sngi lyngba ki kali kamai.

Kine ki San seng ki la kyrpad ïaka sorkar ba lada long kaba lah ban pynhiar ïaka dor jong ka Umphniang kali khnang ban pynduh ïa baroh ki jingeh hapoh ka Jylla kumjuh hapoh ki District East bad West Jaintia Hills.

Hashwa ban leit ïakynduh ïa u DC ki san seng ki la pynlong shwa da ka jingïalang lyngkot ha ophis treikam jong ka MPUF ban ïakren phylliew halor kane ka bynta.