Leit iakynduh ka kynhun ka KHADC ia u Lat ka Jylla kum ka dak ka jingburom

Syllad | The Rising MeghalayaAugust 31, 2024

U Chief Executive Member (CEM) ka Khasi Hills Autonomous District Council (KHADC) ha ryngkat u Dy.CEM bad kiwei pat ki EM ki la pynlong ka jingleit iakynduh ia u Lat bathymmai ka Jylla u CH Vijayashankar ha Raj Bhavan kum ka dak ka jingsngew burom.

Ia kane ka kynhun la pdiang sngewbha da ki jingpyni tynrai ha kaba u CEM bad ka kynhun ki la ai ka jingkhublei kyrpang ia u Lat bad pdiang sngewbha ia u sha kane ka Jylla.

Na ka liang u Lat u la pyrto ia ka Meghalaya halor ka jingdon ia ki jaka kiba itynnad bad ia ka rukom long jong ka suinbneng. U la ban jur ruh halor ka jingdonkam ban kyntiew ha ka liang ka pule puthi na ka bynta ban kyntiew ia ka roi ka par jong ka Jylla.

U Lat u la pynpaw ruh ka jingsngewkhia halor ka mat kaba iadei bad u drok bad iamir jingmut ruh halor ki sienjam ban iakhun pyrshah iau drok. Nalor kata u la kren ruh halor ki lad jingiada ia ki jingthaw ba im bad halor ka jingdonkam ia ki sienjam ban iada ia ki jait jingthaw ba kynrei bad riewspah jong ka thain.

U la pynshlur ruh  ban thung ia ki jait jingthung tynrai ban kyrshan ia ka jinglong ryntih jong ka mariang bad pynpaw ruh halor ka  jingdonkam ban pynneh pynsah ia ki marpoh khyndew, ki tyllong um hapoh ka Jylla.

Na ka liang u CEM bad ki dkhot ki la pynpaw sha u Lat ha kaba iadei bad ki tynrai jong ka imlang sahlang, kaba kynthup ia ki Dorbar Shnong, Elaka bad ka jingdon ia ka Council bad halor ka bynta jong ka Council ban pynneh pynsah ia ka tynrai, ka mariang bad ban kyntiew ia ka bha ka miat ha ka imlang ka sahlang.

Ka kynhun ka KHADC ka la khot sngewbha ruh ia u Lat ka Jylla ban leit jngoh ia ka ‘Law kyntang ne ‘Sacred Grove’ ha Mawphlang, ha kaba na ka liang u Lat u la mynjur bad pynbeit ban leit jngoh ha ka 3 tarik Nailur.

U Lat u la ai ruh ka jingkitbok kitrwiang na ka bynta ka KHADC bad pynthikna ia ka jingkyrshan ka jong u ia ka sienjam ka jong ki na ka bynta ban kyntiew ia ka roi ka par hapdeng ki nongshong shnong trai muluk.