Leit iakynduh ka Myntri iaki nurse ka Jylla ha Japan; yn jurip ia ka rukom rep tit

Syllad | The Rising MeghalayaSeptember 4, 2024

Ka Myntri ka Tnad ka Koit ka Khiah ka Jylla ka Kong Ampareen Lyngdoh ka la pynlong ka jingleit iakynduh ia ki samla ka Jylla kiba trei kum ki Nos ha Japan ha kaba ka la ioh ruh ban iamir jingmut bad ki halor ka jinglong jingman hadien ba ki la leit ban trei sha kane ka ri.

Ha kane ka jingleit la synran lang ia ka Myntri da u Secretary ba khmih ia ka Tnat ka Koit ka Khiah u Ram Kumar nalor kiwei pat.

Ha Japan ka Myntri ha ka 2 tarik mynta u bnai ka la leit jurip ia ka Tsurumaki Onsen Hospital bad iakynduh ia ki laingut ki nos kumjuh ia u Director jong ka Institute. Kine ki nos na Meghalaya ki la leit ban trei sha kane ka hospital lyngba ka jingshim khia da ka Sorkar Jylla bad ka Navis Corporation.

Ka Myntri ka la pynlong ruh ka jingleit jurip ia ka Alive healthcare centre ha Tokyo bad iakynduh ruh ia u president ban iamir jingmut halor ka jingangnud jong kane ka jaka aijingsumar ban thung kam biang sa 10 ngut ki nos na Meghalaya.

Ki bor pyniaid jong kane ka jaka sumar kin sa wan ruh sha Shillong ha ka 17 tarik mynta u bnai shibynta jong ka Job Fair na ka bynta ka jingpynrung ha ki kam nos ki ban sa leit aijingshakri sha Japan.

Ka kynhun ba la ialam da ka Myntri ka la pdiang sngewbha ia ka kabu ba la plie da ka Alive healthcare bad pynthikna ruh halor ka jingkyrshan kaba pura na ka liang ka sorkar Jylla ba ki nos na kane ka Jylla kin leit ban trei ban ktah sha Japan.

Ka Myntri ka la iakynduh ia u Nonglamktien ka India sha Japan hapoh ka Embassy jong ka India ha Tokyo.

Katba ha ka 5 tarik ka Myntri kan leit sha Kurihara-shi, Miyagi Prefecture ha kaba kan leit jurip ia ka Mizudori Farm jong ka  Yats Corporation Private Limited ban lum jingtip shuh shuh ha kaba iadei bad ka kam rep Tit Shiitake.  

Kane ka jingleit jurip ka la wan long ruh hadien ka Memorandum of Understanding ba la ia soi hapdeng ka Yats Corporation Private Limited bad ka Tnad ka Rep ka Riang bad ka Hill Farmers Union (HFU) ha u snem 2019 na ka bynta ka jingrep ia u Tit Japanese Shiitake Mushroom ha Meghalaya.