Leit iashim bynta u CM Conrad sha ka jingleit on tep ia u Pope Francis ha Vatican

Syllad | The Rising MeghalayaApril 26, 2025

U Myntri Rangbah ka Jylla u Conrad K Sangma u la leit sha Vatican ban sakhi lang ia ka jingleit on tep ia u Pope Francis haka sngi Saitjain.

Haba iasoh lang bad ki lak ngut ki paidbah ha St Peter’s Square, u Sangma u la ai burom ia une u khliehduh jong ka Balang Catholic bad ong, “Nga sngew ba nga long uba la kyrkhu da shisha mynta ka sngi ban long shibynta jong kane ka jingleit on tep ia u Pople Francis. Nga la ioh ia ka lad ban iakynduh ia u ha kine ki ar snem kiba la leit noh, bad mynta ban ia don bynta ha kane ka jingleit on tep ka long da shisha kaba sngew don burom bad nga sngew ba nga long uba la kyrkhu shibun.”

U la bynrap, “Mynta ka sngi, wat ha ka jingleit on tep ia u, kumba u ju leh ha ka por ba u dang im, u la pyniatylli ia ki briew na kylleng ka pyrthei. Ki briew na kylleng ka pyrthei ki la wan ban ai burom ia u Pope Francis. Ngin sngew kynjah halor ka jingduh noh ia u, bad to ai ba ka mynsiem jong u kan shongthait ha ka jingsuk ka bymjukut.”

Ha kane ka jingleit sha Vatican la synran lang ia u Myntri Rangbah ka Jylla da u Officer on Special Duty bad Political Secretary u Bah Daniel Thangkhiew.

U Conrad u la iakynduh ia u Pope Francis ha Vatican ha u bnai Nohprah 2022 ha kaba u la kyrpad ia une u nongialam ba hakhliehduh ka Balang Catholic ha kaba u la kyrpad ia u ba un duwai lem na ka bynta ka Jylla, ka Ri bad ki nongshong shnong.