Leit jngoh u CM bad ki dkhot ka kynhun Myntri ia ka jingkieng ‘Living Root Bridge’ ha ka shnong Siej

Syllad | The Rising MeghalayaJanuary 12, 2025

U Myntri Rangbah ka Jylla u Conrad K Sangma ha ryngkat ki dkhot ka kynhun Myntri kiba kynthup ia ka Myntri ka Tnad ka koit ka khiah ka Kong Ampareen Lyngdoh, Myntri PHE u Marcuise N Marak nalor ki heh sorkar na ki Tnad sorkar bapher bapher ha ka 11 tarik Kyllalyngkot ki la pynlong ka jingiaid lynti kaba 20 km da ka bus ban leit jngoh ia ka Jingkieng Living Root ha ka shnong Siej, Shella Bholaganj, East Khasi Hills.

Kane ka jingleit jngoh ka long ruh shibynta jong ka Cabinet Retreat ba ar sngi kaba dang iaid shakhmat hapoh Sohra.

Kane ka Cabinet Retreat kaba dei ka sien kaba nyngkong eh ka buh ruh ia ka jingthmu lypa halor ka jingkyntiew ia ka roi ka par jong ka Jylla kat haduh u snem 2032, kata ha kaba ka Meghalaya kan kynjoh sha ka 60 snem jong ka jingioh jylla ba pura.

Ka jingleit jngoh iaka shnong Siej ka long ban sakhi ia ka jingkieng Umkar Living Root Bridge ba la tip kum ka jingkieng Jri bad ban iakynduh ia u Bah Hally War uba dei u rangbah uba la sdang halor ka jingthain ia ki tynrai thied dieng kiba im ban pynlong ia kane ka jingkieng.

U CM haba kren ha kane ka jingleit jngoh u la pynbna ia ka jingangnud jong ka sorkar ban pynneh pynsah ia ki riti dustur kiba la rim bad ban kyntiew ia ki jingtei bad jingshna jong ki trai muluk.

Haba kren sha ki nongshong shnong bad ki nongïalam kiba pyntrei ia ki projek, u CM u la pynpaw ïa ka jingkongsan jong ka jingkieng Living Root Bridge kaba la long ka bynta kaba kongsan jong ka kolshor jong ka thaiñ mynta lah palat 300 snem.

Kane ka jingkieng kaba kyrpang kaba la shna naduh ki kpa tymmen jong ka shnong ka dang iai long ka dak jong ka jingtei kaba neh bad ka jingroi kaba neh kaba la pynlong da ki nongshong shnong.

“Ka jingstad jong ki kpa tymmen jong ngi ka la lam sha ka jingpynlong ia kane ka jingkieng kaba itynnad bad kaba treikam,” ong u Conrad da kaba bynrap, “Ka long kaba phylla kumno ka imlang sahlang ka la iatylli lang ban pynneh pynsah ia kane ka riti dustur ka basn pynthikna ia ki pateng kiba dang lung ba kin nang ban bteng shakhmat ia kane ka kam.”

U nongialam shnong uba dei ruh u briew uba don ka bynta kaba khraw ha lyndet jong kane ka jingkieng Jri ha Siej u Bah Hally War u la sdang ban thain ia kane ka jingkieng Jri naduh ba u dang khynnah samla bad u la shakri ia kane ka shnong kum u Rangbah Shnong mynta lah jan 40 snem kynthih.

Na ka liang ki trai shnong kila pyntip ba ki don haduh  kumba 10,000 ngut ki nongwan shangkai kiba ju wan manla u snem ban wan jngoh ia kane ka jingkieng Jri.

Ha kane ka jingleit jngoh ia kane ka shnong Siej na ka liang u CM ula pynbna ruh ia ki project kam pynroi ba thymmai ban pynjanai ia ki lad pyniaid ha ka thain, kynthup ka jingshna ia ki surok ba thymmai bad ka jingkyntiew kyrdan ia ki iingskul. U la kren ruh shaphang ka jinglah ban kyntiew ia ka kam jngohkai pyrthei ha kane ka thain.