Leit jngoh u MP ka Tura ia ka NEIGRIHMS, kular ban pynsngew ia ki jingeh sha ka Sorakr Pdeng 

Syllad | The Rising MeghalayaSeptember 11, 2024

U MP Lok Sabha ka Congress na Tura, u Saleng A Sangma ha ka 9 tarik Nailur u la pynlong ka jingleit jurip ia ka North Eastern Indira Gandhi Regional Institute of Health and Medical Sciences (NEIGRIHMS) hadien ka jingshah thung ba dang shen jong u kum u dkhot jong ka Governing Council.

U MP u la lum ruh ia ka jingialang ha kaba u la ioh pdiang ia ki jingpynshai halor ka jinglong jingman jong ka NEIGRIHMS. Kane ka jingiakren ka la long kaba seisoh ha kaba u la ioh ruh ban iakren bad ki doktor kumjuh bad ki khlieh jong ki tnad bapher bapher jong ka NEIGRIHMS.

Ha ka jingkren, u MP u la pynpaw ia ka jingkmen ban ioh wan jurip ia ka NEIGRIHMS bad ba ka jingthmu ba kongsan ka long ban ioh ia ka jingshai kaba bniah halor ki mat bapher bapher kiba ktah ia ka NEIGRIHMS. U la ong ba lyngba kane u lah ban rah ia ki mat sha ka sorkar pdeng khnang ban pynthikna ba ka NEIGRIHMS kan kylla long ka jaka aijingsumar kaba paka halor ki lad aijingsumar sha ki paidbah jong ka thain Shatei lammihngi (Northeast) hi baroh kawei.

Katba na ka liang u Director ka NEIGRIHMS u Prof Nalin Mehta u la pynpaw ha u MP halor ki mat ba kongsan bad ki jingsngewkhia halor ka jingduna doktor hapoh kane ka jaka sumar, ka jingsahteng kaba la slem ban khmih bniah ia ki nongtrei bala slem (Cadre), ban rah ia ka kyrdan kaba ia ryngkat bad ka AIIMS New Delhi bad PGIMER, Chandigarh bad ka jingdonkam ia ka jaka ban shna ia ka Guest House na ka bynta ka jingdonkam ki nongpang. Ula ban jur ruh ia ka jingdonkam ban ai ia ka kyrdan Institute of National Importance (INI) ia ka NEIGRIHMS ban iarap ha ka ban weng mardor ia ki jingeh.

U Sangma ula ong ba ka thain baroh kawei ka phaikhmat sha ka NEIGRIHMS namar ba kadei ka Hospital kaba bha tam bad ka jaka ai jinghikai ha ka thain bad kumta un shimkhia mardor ia katei ka kam.

Nalor kata ha ka jingialang u MP u la ong ruh ba un lum ia ka jingialang bad baroh ki MP ka thain Shatei lammihngi khlem da khein ia ka seng sain pyrthei kaba ki don hynrei ban iarap ban pynbeit ia ki kynrum kynram kiba kongsan ha NEIGRIHMS, namar ba kane ka jaka ai jingsumar ka long kaba kongsan bha na ka bynta ka thain hi baroh kawei.

Ha kajuh ka por u la pynthikna ruh ba un rah ia ka jingkyrpad ka NEIGRIHMS’s na ka bynta ban ioh ia ka jaka ban tei ia ka Guest House na ka bynta ki nongpang hajan kane ka jaka sumar namar kane kan long ka jingiarap kaba khraw ia ki nongpang kiba wan na ki jaka kiba jngai ban ioh jingsumar ha kane ka jaka.