Leit jngoh u Myntri ka jylla ia ka projek pynmih bording ha West Bengal

Syllad | The Rising MeghalayaDecember 8, 2023

U Myntri ka Tnat bording ka Jylla, u Abu Taher Mondal haka 7 atrik Nohprah, ula pynlong ka jingleit jurip ia ka Pump Storage Programme ha Puralia (PPSP), West Bengal, kaba dei ka project pynmih bording ba 4×225 MW ia kaba la plie ha u 2007.

Ia une u Myntri la synran lang da u Sanjay Goyal, Commissioner & Secretary ka Tnad bording ka Jylla bad u Subhasankar Debsarma Biswas, Director (Generation) ka West Bengal State Electricity Distributor Company Limited (WBSEDEL) uba la ai ka jingbatai ba bniah sha u Myntri halor ka rukom treikam jong ka project.

Kane ka jingleit jurip  jong u Myntri ia katei ka projek pynmih bording ha West Bengal ka long ban bishar bniah ia ka rukom treikam jong ka bad ban lah ban pyntreikam ha la ka jong ka jylla kaba iakynduh  jingeh shibun ha kaba iadei bad ka kam bording.

Na ka liang une u Myntri u la ong “Ka jingleit jurip ia ka Purulia Pump Storage Project (PPSP) ka dei kaba ai shibun ki lad jingtip. Kane ka dei ka pump storage project ba nyngkong eh ha India ka ban pynmih 900MW. Haba khmih ia ka jingdawa bording hapoh ka Jylla jong ngi, ngi thrang ban shim ia ki sienjam ban lah pynkhlain ia ki jingtreikam kiba iadei bad ka jinglah ban pynmih bording hapoh ka Jylla”.

PPSP ka pyndonkam da ka buit pump storage ban pynmih bording ha ka por ba jur bha ka jingdawa bad ioh ruh ban pyndonkam ha ka por ba duna ka jingdawa thang bording. Ka Jylla Meghalaya ka don 8 tylli ki hydro electric power plant bad ka jingpynmih bording ka long 355MW bad shim bording 288 MW na kiwei. Bad kumba 68 percent ka jingpynmih bording ka jylla ka iadei bad kibym ktah iaka mariang.

Kumjuh na ka liang u Sanjay Goyal u la ong, “Ka sorkar kan shim ia baroh ki lad ki lynti ban weng ia ki jingeh halor ka jingkyrduh bording ha ka jylla. Ki don shibun ki hydro projek ha ka jylla bad ki jingtip kiba ngi la ioh na kane ka jingleit jurip ia ka Purulia yn lah ban pyntreikam ha ka jylla jong ngi.”