Leit jurip biang u Myntri ia ka jingkieng Umiam, pynkhreh ban plie noh kut bnai

Syllad | The Rising MeghalayaJuly 27, 2024

U Myntri ka tnad Bording u Abu Taher Mondal ha ka 26 tarik Naitung u la leit jurip biang ban khmih ia ka jingiaid shakhmat ha ka jingpyntrei hapoh jong ka Dam Rehabilitation & Improvement Projects (DRIP) ha ka jingkieng Umiam.

Shwa kane ka jingleit jurip u Myntri u la khot pynlong ia ka jingialang iamir jingmut halor ka jingiaid shakhmat jong ka kam kaba iadei bad kane ka jingkieng Umiam. Ha kane ka jingialang la ia don lang u Sanjay Goyal, IAS, Commissioner & Secretary ka Power Department bad Chairman-cum-Managing Director ka Meghalaya Energy Corporation Limited (MeECL), u Bah Bloomingstar Wahlang, Director Generation MePGCL lem bad kiwei pat ki heh ophisar ka MeECL bad ITD Cementation.

Na ka liang u Myntri u la pynpaw ia ka jingkyrmen ba ia kane ka jingkieng yn lah ban plie noh pura ha kaba kut jong une u bnai bad bynrap ba yn pynlong ia ka High Power Committee ha ka 29 tarik mynta u bnai na ka bynta ban pynbeit ia ka tarik ban plie.Ha kane ka jingialang yn ia don lang ruh u consultant na ka IIT Guwahati, ka Director General of Police, ki heh ophisar ka PWD bad ki bor pyniaid district ka East Khasi Hills bad Ri Bhoi.

U Myntri u la ban jur halor ka jingdonkam ban pyndep noh kloi ia ki kam kiba dang sah khnang ban pynthikna na ka bynta ka jingshngain bad ka jingshan slem jong ka Dam.

Lah ban kdew ba ki kam ba la pyntrei hapoh jong ka Dam Rehabilitation & Improvement Projects (DRIP Phase II & III) ka la sdang naduh ka 14 tarik u Nohprah 2023.