Leit jurip u CM ia ka Purakhasia bad ki jaka ba marjan hadien ka jingshlei um ha Rilum Garo

Syllad | The Rising MeghalayaOctober 11, 2024

U Myntri Rangbah ka Jylla u Conrad K Sangma ha ka 10 tarik u Risaw u la pynlong ka jingleit jurip ia ka shnong Purakhasia bad ki thain ba marjan ban bishar bniah ia ka jinglong jingman hadien ki jingjia shah pynjulor ba dang shen na ki shlei um bad ki jingtwa khyndew hapoh Rilum Garo.

Na ka liang u CM u la pynlong ruh ia ka jingialang bishar kam bad ki bor pyniaid district bad ki ophisar hapoh Purakhasia Block Office ha Puran Bazaar. Nalor kata u la pynlong ruh ka jingiamir jingmut bad ki nongshong shnong bad pynthikna sha ki halor baroh ki jingkyrshan na ka liang ki bor pyniaid district bad ka sorkar.

U Conrad u la ong ba nalor ki iing ki sem ki la don bun tylli ki pung bad ki jaka rep jaka riang kiba la shah pynjulor ha kane ka jingjia shlei um bad twa khyndew. U la ong ruh ba na ka liang ka tnat ka rep ka riang lem bad kiwei pat ki tnad sorkar kin khmih bniah halor kane bad ban pynioh ruh ia ka jingiarap sha kito kiba shah ktah.

Nalor kata u la pynlong ruh ka jingleit jurip ia ki tyllong um kiba don harud jong ka wah ha Purakhasia kumjuh ia ka jingkieng kaba pyniasoh ia ka shnong Wagigitok sha Akimpara lyngba ka wah Grim.

Hapoh ka shnong Aikinpara bad Posenggagre u CM u la iakynduh ia ki nongshong shnong bad shah shkor ia ki jingpynpaw ki jong ki da kaba kular ruh ban pynioh ia baroh ki lad jingiarap na ka liang ka sorkar.

Shuh shuh u la pynlong ruh ka jingleit jurip ia ka jingkieng Thallang ha ka shnong Angalangre kumjuh ia ka jingkieng kaba la shah pynkhyllem noh halor jong kawah Norang ha Rimrangpara.