Leit jurip u CM ia ka surok na iew Wansing sha Dorrengre; shen yn pyntrei noh

Syllad | The Rising MeghalayaOctober 11, 2024

U Myntri Rangbah ka Jylla u Conrad K Sangma ha ka 11 tarik u Risaw u la pynlong ka jingleit jurip ia ka lynti surok na ka Iew Wansing Bazar ha Dorrengre.

Haba iamir jingmut bad ki nongshong shnong hadien kane ka jingjurip, u CM u la ong ba ka dei ka jingangnud ba la pynpaw da ki nongialam shnong jong ka thain halor ka jingdonkam ban shna noh ia kane ka lynti surok.

“Kane ka surok Dalu-Gambegre ka dei ruh kaba don hajan eh bad ka sor Tura bad ka dei ruh kaba donkam bha na ka bynta ki nongshong shnong jong ka thain kiba la ju iakynduh ia nga na ka por sha ka por na ka bynta ban shna ia kane ka surok. Nga sngewkmen ban pyntip sha phi ba ka jingpynkhreh ia ka DPR na ka bynta kane ka surok ka la iaid shakhmat da ka Tnad PWD bad ka jingpyntrei ia ka kam kan sa sdang shen,” pyntip u CM.

La mang T.5.56 klur na ka bynta ban shna ia kane ka surok na iew Wansing Bazar sha Dorrenge ha ka jingjngai kaba 5.5 km.

Ki nongshong shnong ki la pyntip ruh sha u Conrad ha kaba iadei bad ka Chisakgre Sub Centre ha kaba la sdang ban tei shuh shuh ia ki jingtei hynrei ia kiba la shu iehnoh kumto. Halor kane ki la kyntu ba un phah bteng biang ban tei pyndep ia kine ki jingtei na ka bynta ka jingmyntoi jong ki nongshong shnong.

Nalor kata ki la pyntip ruh sha une u Myntri halor ka jingdokam ia u Transformer bad ki sem ne jaka shong iew ha Wansing Bazar.

Na ka liang u CM u la pynthikna sha ki paidbah ka thain ba un peit bniah halor kine ki jingdawa, katba ia ka jaka shong iew yn sa mang na ka Chief Minister’s Development Fund.