Leit jurip u CM ia ki jaka ba shah ktah ha ki bor mariang ha Rilum Garo; iarap song pisa sha kiba haiing ba khlad

Syllad | The Rising MeghalayaOctober 8, 2024

U Myntri Rangbah ka Jylla u Conrad K Sangma ha ka 8 tarik u Risaw u la pynlong ka jingleit jurip ia ki jaka kiba ngat ha ki jingshlei um bad twa khyndew ha West Garo Hills bad South Garo Hills ha kaba u la iakynduh ruh ia ki lanot bad sam ia ka song jingiarap pisa sha kiba haiing hasem jong kito kiba la khlad noh ha kine ki jingjia.

U CM uba la sam ruh ia ka jingiarap kaba mar T.4 lak sha kiba haiing hasem jong kito kiba la khlad noh ha kiba buntylli ki jingjia twa khyndew bad jingshlei um u la pynpaw ia ka jingsngewsih kaba jur halor kane ka jingeh ei jong ki mynsiem briew na ka jingshah lyngshop ha ki bor ka mariang.

Lah ban kdew ba ka Rilum Garo kala shah lynshop tyngeh ha ki bor ka mariang ha kine ki khyndiat sngi ba la dep kaba la shim ruh ia ka jingim jong haduh 17 ngut ki briew ha ki sawtylli ki district.

Ha ka shnong  Rongkhon Songgital ha Tura u CM u la aiti ia ka song pisa ba T. 8 lak sha ka kurim jong u (L) Bijoy Marak u nonghikai skul uba ka kali jong u ka la shah rong ha ka umsaw kaba la shim ia ka jingim jong u lem bad u khun jong u, u Wian Chigado R Marak ha ka jingjia kaba la jia ha ka 4 tarik mynta u bnai.

Ha ka shnong Karonggre ha Dalu, WGH u CM u la aiti ia ka song pisa kaba T.4 lak sha kiba haiing hasem jong ka Sanira Marak 18 snem rta kaba la khlad noh na ka jingjia twa khyndew.

U CM u la leit jurip ruh ia kiba haiing hasem jong u Miando P Marak u khynnah 5 snem rta uba la khlad noh na ka jingtwa khyndew katba u dang ialehkai ha lyndet iing ha ka 4 tarik mynta u bnai ha ka shnong  Sorokpara ha Dalu bad aiti ia ka song pisa ba T.4 lak.

Ha Tibapara ha Dalu u CM u la leit jngoh ruh ia kiba haiing hasem jong u Tengseng R Marak uba la khlad noh na ka jingkhyllem jong u dieng ha ka kali jong u ha Songsak bad ai ia ka song pisa ba T.4 lak.

Nalor kata u la leit jngoh ruh ia kiba haiing hasem jong ka longkmie Santa Marak kaba la shah tep im na ka jingtwa khyndew ha ka shnong Koinabhui ha Dalu bad aiti ia kane ka song jingiarap.

U Conrad u la bishar bniah ruh ia ka jinglong jingman bad ki jingjulor ha kine ki jaka  bad iamir jingmut ruh bad ki nongshong shnong kiba la shah ktah.

Hadien u la pynlong ruh ia ka jingialang bishar kam bad ki bor pyniaid district ka WGH ban lum jingkhein halor ki jingjulor na kine ki jingjia jong ka jingshlei um bad jingtwa khydnew ha Dalu C&RD Block bad ruh ban khmih bniah ha kaba iadei bad ki kam aijingiarap.

Ha Dalu C&RD Block ka jingpynjulor lyngba ki bor ka mariang ka la ktah ia palat 2630 tylli ki longiing bad shim ia ka jingim jong ki hynriew ngut ki briew. Na ka liang ki bor District kila buh haduh 68 tylli ki jaka shong shipor bad sam ruh ia ka bam ka dih sha ki palat 17000 ngut ki lanot ba shah ktah.

Ha ka jingialang bishar kam u Conrad ula bthah ia ki Ophisar ban pynlong ka jingwad bniah ia ki wah bad ki jaka kiba don jingma na ka jingshlei um nalor ban shim ia ki sienjam  ban leh eiei ban lah kiar na ki jingshah pynjulor hadien habud.

Nalor kata u la bthah ruh ban maramot noh mardor ia ki surok bad ki jingkieng hapoh  Block bad ban pynthikna ha kaba iadei bad ka jingpynpoi ia ki marbam mar dih sha ki shnong kiba shah ktah.

Ha South Garo Hills, 40 tylli ki shnong ki la shah ktah ha ki 3 tylli ki block na ki jingshah pynjulor ha ka mariang, kaba la ktah ïa ka jingbun briew kaba 2510 ngut ha ki 462 tylli ki longïing.

7 ngut na kawei ka longing kila shah tep im ha ka jingtwa khyndew kaba la rong noh ïa ka ïing ka sem ha ka shnong Atisia Songmong kaba hap hapoh Gasuapara.

U Myntri ula iaid da ka kjat ban poi sha ka iing ki lanot kaba jngai 2 km bad ula ai ruh iaki song jingiarap sha ki lanot.