Leit jurip u MLA ka BJP ia jaka khappud; Iakynduh ia ki heh BSF bad ai mynsiem ia ki paidbah

Syllad | The Rising MeghalayaAugust 8, 2024

U MLA ka BJP ka South Shillong uba dei ruh u Chairman ka Meghalaya Tourism Development Corporation (MTDC) u Bah Sanbor Shullai ha ka 7 tarik Nailar u la pynlong ka jingleit ia ki jaka khappud ka Meghalaya – Bangladesh ha ka thain Dawki Tamabil bad Pyrdiwah ban bishar bniah ia ka jinglong jingman baroh namar ka jingjia iaumsnam hapoh ka ri Bangladesh.

Ha kane ka jingleit jurip ba la synran lang da u Vice President ka Party u Gagan Jain lem bad kiwei pat, u Bah Sanbor u la iakynduh ruh ia u DIG bad Commandant jong ki BSF jong ka thain bad pyrto ia ki sienjam ba la shim da ka tnat shipai BSF ban khanglad ia ka jingwan rung beain jong ki briew napoh Bangladesh.

U Bah Sanbor u la iakynduh bad iamir jingmut ruh bad ki nongshong shnong jong kine ki artylli ki thain kiba la pynpaw ia ka jingshaniah skhem ha ki shipai BSF na ka bynta ban tehlakam ia ka jinglong jingman bad ban pynneh ia ka shongsuk shongsain ha kine ki thain khappud.

Nalor kata u la pynthikna ruh ia kine ki trai shnong ka thain khappud halor baroh ki lad jingiarap lada ka mih ka jingdonkam, ha kaba ki la pynpaw ba ia mynta hi ka jinglong jingman ka don hapdeng ka jingsuk.

Na ka liang ki heh shipai BSF kila pynpaw ba ka Sorkar India ka la pynkhlain bha ia ki lad jingiada ha lynter ki jaka khappud ka Jylla Meghalaya ha kaba ka la phah ruh sah da ki bor shipai na ka Bihar Regiment ban pynkhlain shuh shuh ia ka jingpahara.

Shuh shuh u Bah Sanbor u la pynkhreh ruh ban leit iakynduh ia u Lat ka Jylla ban pynpaw halor kane ka jinglong jingman baroh.