Leit kyndang ka FKJGP ia ki bar Jylla ba thmu buh dukan ha 15 Mer hadien ba kyndang ka Assam

Syllad | The Rising MeghalayaSeptember 7, 2024

Tang shi sngi hadien ba ki bor sorkar ka Assam ki la kyndang naphang ia ki dukan bad ki ïing kiba don ha Iew 15 Mer sha ka liang Assam, haka 7 tarik Nailur ki la don ki katto katne ki briew bym ithuh kiba la wan ban buh dukan ha ki bynta rud surok bah NH-6 kaba hap hapoh u pud u sam jong ka shnong 15 Mer, Ri Bhoi District.

Hynrei tang hadien khyndiat por kine ki dukan ki la shah kyndang bad shah khang khyrdep noh na ka jingwan poi da ki nongialam bad ki dkhot ka FKJGP kiba la maham ia ki ba kim bit ban wan buh dukan hapoh katei ka jaka kaba hap sha u pud u sam ka Meghalaya.

Ka Seng hapoh ka jingialam jong u Samla Kitborlang Suting, Organising Secretary ka FKJGP Byrnihat Circle ha ka jingsynran u Bah Lumlang Mawnai, Vice-president ka FKJGP NKHD lem bad ki dkhot ka FKJGP 15 Mer Unit ki la hiar mardor ban leit khynra ia kitei ki dukan kiba la wan buh beain da ki bar jylla da kaba maham ruh ba ki dei ban weng noh shisyndon ia kitei ki dukan na kane ka jaka.

Na ka liang u Samla Kitborlang Suting haba kren sha ki lad pathai khubor u la ong ba ka seng hi kan ym ailad da lei lei ruh ia kitei ki briew kiba la shah kyndang na Assam ba kin wan buh dukan hapoh u pud u sam ka Meghalaya.

Nalor kata u la ong ruh ba ka seng kan iai peitngor bha nangne shakhmat bad lada lap ia kino kino kiba la shah beh na Assam bad kiba pyrshang ban wan buh dukan ne wan shong wan sah sha ki bynta u pud u sam ka Meghalaya ka seng kan ym ailad bad kan pynher krad ia ki mardor.

Kyndang ka Assam ia ki iing beain ha surok Jorabat-Byrnihat, peitngor ki sengbhalang ka Jylla