Leit mihkhmat ka Irene Dkhar ia ka India sha ka jingiakop ‘Miss Tourism World 2025’ ha China
Ka Irene Dkhar kaba dei ka ‘Miss Tourism India’ ka la leit mihkhmat ia ka India sha ka rynsan iakop thei bhabriew kaba heh ka pyrthei ka ‘Miss Tourism World 2025 Global Finals’ ka ban long ha ka 10 tarik mynta u bnai ha Guangdong, China.
Ka samla Irene ka la mih na New Delhi ha ka 27 tarik u Nohprah 2024 ban pyniasoh bad ka kynhun ki nongiashim bynta na kumba 60 tylli ki ri bad ki thain ka pyrthei kaba kynthup na United States, France, Brazil, Venezuela bad ki dkhot na ki kynhun jong ka Belt and Road Initiative bad Shanghai Cooperation Organization.
Ia ka jingiakop Miss Tourism World la ithuh namar ka jinglah jong ka ban kyntiew ia ka kam jngohkai pyrthei bad ka kolshor jong baroh artylli ki ri kiba pdiang bad ki ri kiba wan iashim bynta.
Ha ka jingialang bad ki lad pathai khubor kaba la long ha Guangzhou ha ka 3 tarik u Kyllalyngkot ki riew pawkhmat kum u Ahmed Mustafa Fahmi uba dei u nonglamktien ka Arab League sha China, u Sinisha Belyan u nonglamktien ka Bosnia bad Herzegovina sha China bad u Ivan Chiulu nonglamktien ka Zambia sha China ki la pynpaw ka jingkyrshan ia kane ka rynsan iakop ia kaba la kyrshan da ka sorkar China.
Ka jingiaid lynti jong ka Irene Dkhar sha ka rynsan iakop ka pyrthei ka long kaba phylla shibun. Hashwa ba kan jop ia ka Miss Tourism India 2024 kaba la long ha Jaipur, Rajasthan ka la ioh khur ia buntylli ki khusnam, kata kaba kynthup ia ka Miss Meghalaya 2022, Miss Northeast 2022, Femina Miss India Meghalaya 2023, bad Miss Grand India Meghalaya 2024.
Ka Miss Meghalaya Organization ka la ai ka jingkitbok kitrwiang ia ka samla Irene da kaba pynpaw ka jingkyrmen ba kan wanrah ia ka pansngiat jingjop sha la iing.
La khmih lynti ba kane ka jingiakop kan long ka rynsan kaba kongsan na ka bynta ka jingiasam halor ka kolshor bad ka jingkyntiew ia ka kam jngohkai pyrthei, bad ka ban pynpaw ia ki sap ki phong hapdeng ki jingiapher ha ka rynsan jong ka pyrthei.
Facebook
Instagram
Youtube
Twitter
Leave a Reply