Leit pyndem ki 2 ngut ki nongpyniap briew hakhmat ki pulit ka WJH

Syllad | The Rising MeghalayaJune 18, 2024

Ha ka jingjia ka bym shym poi pyrkhat, arngut ki briew kiba la shah kynnoh donkti ha ki artylli ki jingjia kam pyniap briew kaba la jia haka 16 tarik Jylliew, ki la wan ban pyndem noh ialade hakhmat ki bor pulit ha West Jaintia Hills.

Kawei na kine ki jingjia shah pyniap ka dei kaba la jia ha ka shnong Sahsniang kaba hap hapoh Raliang Police Station, katba kawei pat ka jingjia ka dei kaba hap hapoh Jowai Police Station.

Ki pulit ki iathuh ba ha ka 17 tarik mynta u bnai, u Nidaiohi Suchiang 29 snem rta na ka shnong Sahsniang A u la wan mih hapoh Jowai Police Station bad phla ia ka jingdonkti ha kaba pyniap ia la u para marjan jong u, u Drup Sutnga.

U Nidaiohi u la kubur halor ka jingdonkti ha kaba thombor ia u Drup Sutnga da kaba pyndonkam da ka tiar ba nep bad hadien u la khum da u ksai siej na u ryndang jong u ban pyni ha ka rukom ba u la shim hi iala ka jong ka jingim.

U la kam ruh ba u la leh ia kane ka kam pyniap namar u ngeit ba u Drup u dei uba donkti ha ki kam leh byrtong, kata ia kaba u la ngeit ba ka la wanrah ka jingshitom ia ka kurim jong u.

Hadien ba la ioh ia kane ka jingtip, ki heh pulit napoh Raliang PS mardor ki la hiar shapoh Sahsniang na ka bynta ban pynthikna halor kane ka jingjia.

Ha ka jingtohkit ia ka metiap jong u Drup la pynthikna halor bun tylli ki dak mynsaw, kata kaba iahap bad ka jingphla jong u Nidaiohi.

Ha kawei pat ka kam pyniap briew, u Do Dkhar 33 snem rta u la wan pyndem noh ia lade hakhmat ki pulit halor ka jingshah kynnoh donkti ha kaba pyniap ia u Nangtei Dkhar uba dei hi na ka shnong Lumkhudung.

Katkum ka jingujor ejahar da kiba haiing hasem jong u Nangtei la kynnoh ba une u lanot u la shah dung da ka tari ha ka jingjia kaba la jia ha ka janmiet jong ka 16 tarik mynta u bnai hapoh Lumkhudung Pohshrah.

Wat hapdeng ka jingpyrshang da kiba haiing hasem jong u ban pynkit mardor shapoh hospital, hynrei u Nangtei u la khlad noh katba u dang don ha ka lynti sha Moodymmai.

Na ka liang ki pulit ki la rejister case halor kine ki artylli ki jingjia kam pyniap bad ka jingtohkit mynta ka la iaid shakhmat.