Leit sam jingiarap ka SDRF sha ki jaka ba shah ktah na ka jingshlei um ha Dalu

Syllad | The Rising MeghalayaOctober 7, 2024

Haba bteng ia ki kam aijingiarap sha kito ki jaka kiba shah ktah ha ka jingshlei um ha Dalu, West Garo Hills, ka Tnad State Disaster Response Force (SDRF) ka Jylla haka 6 tarik Risaw ka la kyrshan lang ia ki bor ba dei khmih jong ka Block ha kaba iadei bad ka jingsam ia ki lad jingiarap ha kiba buntylli ki bynta jong ka C&RD Block.

Ka Tnad SDRF ka la iarap ban pynpoi ia kine ki lad jingiarap sha kito ki jaka kiba la shah ktah kum ha South Kujikura, Rengrampara, Adanggri bad Dalu C&RD Block.

Ha Barongpara ki dkhot ka SDRF ki la hap ban jam lyngba ia ka wah da ki lieng kiba shu shna hi ha ryngkat ki tyllai na ka bynta ban pynpoi ia ki lad jingiarap sha ki nongshong shnong kiba shong ba sah ha kane ka jaka.

Lah ban kdew ba ka Tnad SDRF ka la don ha Dalu ka thain kaba la shah ktah jur ha ka jingshlei um bad ki jingtwa khyndew hadien jong u ‘lapbah naduh ka 4 tarik u Risaw na ka bynta ki kam aijingiarap.

Ka jingdon jong ki briew kiba iap na kine ki jingjia shlei um ki jingtwa khyndew bad kiwei pat ha ki bynta bapher bapher jong ka Rilum Garo mynta ka la kiew sha ka 13 ngut, kata nalor bun ngut kiba mynsaw.