Leit sha Delhi kum u Khlawait ym kum ka Khnai ong u Forwardman iaki nongmihkhmat ka Jylla ban dawa ILP

Syllad | The Rising MeghalayaDecember 16, 2020

“Ki nongshong shnong ka Jylla kila jied ia phi ban leit sha Delhi ban kren da ka jingshlur ha khmat ka sorkar u Narendra Modi, ym ban leit kum ka khnai hakhmat ka miaw ban shu pyndem ba tieng ioh shah bam doh,” la ong u Forwardman Nongrem iaki nongmihkhmat ka Jylla.

U Forwardman ula ong shuh shuh ba “Ka Jylla kala khihwin biang sa shisien na ka jingdawa ban pyntreikam ïaka Inner Line Permit (ILP), hynrei ka sorkar kmie kala wanrah pynban da ka CAA ka ban khot sngewbha iaki 17 million ngut ki Bangladeshi kiba dei Hindu ban wan sah ha kane ka Jylla bad ban ailad iaki ban long ki nongshong shnong ka Ri India, hynrei kynmaw ba ka Jylla Meghalaya kam pat don ia kita ki ain kiba khlain ban teh lakam iaka jingwan rung jubor ki briew ba nabar hapoh kane ka dong ki thain jong ngi.”

U Forwardman ula kren ia kane haka jingialang dawa ILP bad pyrshah CAA kaba long ha Iawmusiang, Jowai haka sngi Balang.

Une u nongialam ula ong “Ngin ieng haka nongrim ban dawa pyndam iaka jingtreikam ka CAA ha Jylla bad lada ka sorkar kam lah ban weng iaka CAA ngin shim hi iaka rai ban buh la ki jong ki ain ban pynthikna ba ka jait bynriew kan im.”

Ka jingpyrta ILP ka la sdang naduh u snem 1985-87 hynrei haduh mynta ym pat ioh iaka ILP watla ki 60 ngut ki MLA kila rah da Resolution ha u snem 2019 sha ka sorkar pdeng.

Ia kane ka jingialang paidbah la pynlong da ka Khasi Student Union (KSU), Federation of Khasi Jaintia and Garo People (FKJGP), Hynniewtrep National Youth Front (HNYF) bad ka Jaintia Student Union (JSU).

Kiwei de kiba la ai jingkren ki kynthup ia Assistant Education Secretary KSU central body u Shining Kharbihkhiew, President ka KSU-JHD u Ohibait Dkhar, u DS War Organising Secretary FKJGP-JHZ, u Treiborlang Suchen General Secretary JSU haka jingialang kaba la pyniaid da u Leningard Tariang Organising Secretary KSU-JHD.

Hadien kane la thang iaka dur tynshop jong u Myntri rangbah ka ri u Narendra Modi bad u Myntri ka tnad kam Pohing u Amit Shah.