Leit tur biang ka KSU sha MPSC; Dawa hiar shuki ia u Chairman bad Secretary

Syllad | The Rising MeghalayaAugust 8, 2024

Ka Khasi Students’ Union (KSU) haka 8 tarik Nailar ka la leit tur biang sha ka ophis ka Meghalaya Public Service Commission (MPSC) bad dawa ia u Chairman bad Secretary jong ka Commission ba ki dei ban hiar shuki noh.

Ha kane ka jingleit tur sha katei ka ophis hapoh ka jingialam u President ka KSU u samla Lambokstar Marngar ha ryngkat u General Secretary u samla Donald V Thabah ka seng ka la thang ruh ia ka dur tyngshop jong ki khliehduh ba dei khmih jong kane ka Commission ban pynpaw pyrshah ia ka jingbym lah ka jong ka ban pyllait paidbah ia ki marks jong baroh ki samla kiba iakhun ia ka eksam MCS (Preliminary).

Nalor kata ka la don ruh ka jingpyrta ha ryngkat ki jingthoh “MPSC Chairman, MPSC Secretary stepdown ne hiar shuki noh”. Ki dkhot ka seng kila rah ruh ia ki banner kiba don ia ki jingthoh “Ka Iing wanrah kam-MPSC,Ka jingthep kam tuh-MPSC”, “Shaniah ia ka MPSC, lah kumba shaniah ia ka Iing skum.”

Haba kren sha ki lad pathai khubor u president ka seng u la ong ba kane ka jingaidaw jong ka MPSC ka dei ka jingpyrshang ban buhrieh ei ei. “Lada ka don shisha ka jingtreikam kaba khuid ba suba ha ka MPSC, kumta ruh ka jingkylli kaba mih ka long balei ka la bunkam tang ha kaba pynkylla ia ki jingkren, jingpynshai na ka Commission,” ong u samla Lamborstar.

U la ong ba ka MPSC ka la pynmih ia ka jingpynbna paidbah ha ka 6 tarik mynta u bnai kaba pan ia ka jingmynjur jong ki samla kiba iakhun ia ka eksam MCS (Preliminary) na ka bynta ka jingpyllait paidbah ia ki marks jong ki.

Shwa kane ka MPSC ka la pynpaw halor ka jingbym lah ban pyllait paidbah ia ki marks namar ka jingpynpaw pyrshah da ki katto katne ki samla kiba iakhun ia kane ka eksam namar kane kan long kum ka jingpynkhein noh ia ki hok ba shimet jong ki (privacy).

“Ngim lah sngewthuh kaba kum kaei kata ka jingbuhrieh (privacy) kaba ki kren.Haba bun na kine ki samla kiba iakhun ia ka MCS ki la wan iakynduh ia ka KSU bad pynpaw halor ka jingdonkam ban pynthikna ia ka jingtreikam kaba khuid bad shai ha ka jingthung kam da kaba pyllait paidbah ia ki mark jong ki, hynrei balei pat ka MPSC ka pyrshang ban buhrieh ia kane,” buh jingkylli u nongialam ka KSU.

Une u nongialam ka Seng u la ong ba ka KSU ha ka 5 tarik Iaiong, 2018 kala iakynduh ia ka sorkar Jylla bad kren shai ba ki jingthungkam ha ki kyrdan ka MPSC bad DSC ki dei ban long kiba shai bad ba khuid.

Nalor kata u la ong ruh ba ka seng kan iai bteng ban iakhih tad haduh ba ka MPSC kala pyntreikam ia ki jingdawa jong ka seng ban pynthikna ia ka jingthungkam kaba shai bad ban pynkut syndon ia ka jingthungkam bahaiing ne ba jied ia kiba ithuh ithaw da kane ka Commission.

“Ngim kwah satia ba ka MPSC kan dei ka jaka ban lum pisa ne ka jaka ban pynsngewbha ia ki Myntri Sorkar, ki riew sain hima lane ki heh ophisar. Ngi dawa ia ka jingtreikam kaba shai bad kaba khuid hapoh ka MPSC bad ngin ym ailad ia kum kane ka tnad ba kan ialehkai bad ka lawei jong ki samla wad kam,” u la bynrap.