Li peit li sylli ka bor District WJH yei man yei long ka Wah Myntdu nei pynoor khyndaw chna surok
Ka yung krehkam u Deputy Commissioner ynne ka 17tarik Duiatra chirrup kiwi ki tnat krehkam ka Sorkar wa kynthup ya ka Executive Engineer PWD (Rds) Jowai Central Division, Jowai wa ka Executive Engineer Water Resource Jowai Division, West Jaintia Hills deilang ki dkhot ka Sein Khooid Ya ka Wah Myntdu wa ka Jaintia Fishing and Environment Protection Association da pynman ki i li peit li sylli ya ka Wah Myntdu.
Ya ini I lai boodien wow peit u sylli yei man ki bynta ka wah Myntdu da yahkhmat da u S Phanbuh, MCS, Assistant Commissioner, Revenue West Jaintia Hills chirrup I synranlang ki dkhot ka Sein Khooid ya ka Wah Myntdu hei yahkhmat u Khroo L Pariat, President, ki dkhot ka Jaintia Fishing and Environment Protection Association hei yahkhmat u D.H.Pde, President wa u Executive Engineer PWD Road wa u SDO ka yung krehkaam ka Executive Engineer Water Resource Division, West Jaintia Hills.
I daw wa pynman ya ka yung krehkam u Deputy Commissioner, West Jaintia Hills wow li peit li sylli yei man ka wah Myntdu toh hadien wa mih I ood I nam wei niawliar niawtang ki paidbah wa chong chnong wa ki warep yei man wym chngain de I ioh umbam umdih umsait umkhlein ka chnong ka thaw ha ki por ki sngi wa chakhmat neidaw wym em de I khlooh I tong iow chyiap wa da dap da chlai ha ki waboon ki bynta ka Wah Myntdu kamjooh leh I iohlad ki bru wow noh ya ki jhep ki jakhlia ha chilynter wei u pynoor khyndaw kat wa ngeit ha chilynter ki bynta ka wah Myntdu khamtam ha ki bynta wa dang chna ya u surok thyme wa em ha Treiong-riang.
Neiliang u Khroo L Pariat da khana pynsniaw u hakhmat u S Phanbuh, MCS, Assistant Commissioner, Revenue West Jaintia Hills ya kiyi kiyi ki rai kiwa da booh hei thoh haman wa pynman I boodien kamni heiyatoh wow e yada ya ka Wah Myntdu khnang iow chngain u biang I ioh umbam umdih umsait umkhlein kiwa chong chnong ha Jwai wa ki warep Kba ha ki Pynthorneiñ Pynthorwah khamtam yow nang yæ u pynneh pynsah ya kiwa im ha tawiar ka wah Myntdu.
Yeini I lai sylli boodien ha kani ka sngi da sdang na Liar Pam Kam kawa da jan wiar neidaw wa da pyndap Khyndaw na i khloh surok kawa man ka liar ka chka wakai wa psa um ya ki Hali wa ka wah Myntdu neitae ha Yiengkein Myntdu ha Tre-Iongriang wei da pynkut wan ha OorKhla wow peit najngai yei man ka thwai Mupiah wa man ka thaw wow rin umbam umdih ya ka chnong Jwai.
Ki dkhot ka Khooid ya ka Wah Myntdu wa ki dkhot ka Jaintia Fishing and Environment Protection Association da pynsniaw ki hakhmat u S.Phanbuh wa I por dawa wow tong, u khlooh noh iow chyiap ha ki bynta wa da wiardur I man ka wah Myntdu khnang iow iohlad ki khon ka thwai ka langen u im u chong u sah kamjooh iow man ki lynter ka wah Myntdu kiwa dap da ka um hei thaw u chyiap ki moo.
Neiliang ki dkhot iong ka Khooid ya ka Wah Myntdu wa ki dkhot ka Jaintia Fishing and Environment Protection Association ha kani ka sngi hawa poi ha ki bynta ka Tre-Iongriang kjutnood ki u chem u ioo u sakhi wa I rukom pynoor khyndaw iong kiwa chna iow surok thymme daman iwa leh khlem da pyrkhat wei booh ym toh dæ hei ma tangwa daw pynduh yei man ka wah Myntdu wa ka Mynkrem ha ki por wa chakhmat man da poi I samoi iong u slap ka pylliang.
Chooh chooh hei sylli bniah, iwa phylla u chem da kiwa embynta ha ini I boodien toh kat kam ka rukom I kmai yong uni u surok toh u man I du 25 metre tangwa man da thaw da woh da chem wa I rukom pynoor khyndaw da man iwa da palat na i jingkhein wa damang dabooh namo da toor cha u pood u ang ka Myntdu. U Dak Jingkylli waheh, Kattu Yei yi u kynnoh, yi won wow chim i kitkhlieh yow pynbha ya ka rood ka Myntdu? Ha lyndet ini I leh palat pood wei rukom pynoor khyndaw wa khlem pyrkhat de yei man ka Wah Myntdu wa kiwa chkæh wa im wa ka. Iwa sniaw sih u yō wa ka Mynkrem ka khooid bha tangwa kattu da wiar ko, kiwa boon ki tyllong um na khap ki loom da wiar ki neidaw wa da pyndap da loor kiwa chna ya u surok.
Neiliang u Khroo L Pariat, President KYM, ha lyndet ini I wa ioh ki u ioo u chem, ong u ym em thylliej de u batai. Kattu yang hi eh sa du wow ioh u ioo ya ka Bui wa i yi u pynkrehkaam ka yung krehkam u Deputy Commissioner, West Jaintia district wa ka JHADC katkam ka hukum ka NGT kawa da ujor da u Ma Sajay Laloo pyrchah ya ka Sorkar wa kiwi, dep neitae iow tip wan u pyrkhat wei u leh yei wa emkam kat kam wa chah ka ain.
Kamtæ Da kyntu ya waroh kiwa chong chnong tawiar ka Myntdu khamtam kiwa im wa sah ha Jwai wa kiwa makhane ya ka Myntdu, ham chah wa i wym klam phi u pynman ko i chah Tim mynda heh da tymmen neinuwym hoi dæ u man kiwa peit du ki Khmat u boon du i yaklam ya parom. Dawa ko ya waroh yow mih chakhmat, katkam wa chynna ya iwa da jia ha ka Myntdu, ka sorkar jylla, ka JHADC, kiwa MLA MDC ym mano ym bna dæ ki ya ki Bru kiwa im wa ya ka Myntdu. Contributed
Facebook
Instagram
Youtube
Twitter
Leave a Reply