Lip bording khah khah ba sahteng ka jingthmu shna sub station thymmai haka thain Nartiang

Syllad | The Rising MeghalayaSeptember 22, 2020

Hadien ba ki nongshong haka jaka khappud Assam bad Meghalaya kila mad jingeh naka daw ka jinglip bording ba khah khah, ka KSU Namdong Unit haka sngi Nyngkong kala leit ban iakynduh Superintending Engineer MeECL u M Patlong ban kyrpad ia u ban shimkhia ban pynbha iaka line bording sha baroh ki shnong khappud kaba hap ha Nartiang Constituency.

Ha kane ka jingiakynduh ia u SE ka MeECL, Jowai la lam khmat da u president Namdong Unit Chanbor War bad u president ka Nartiang unit u Habanjop Raliang nalor kiwei kiwei ki dkhot.

Ka KSU kala kyntu ia u SE MeECL ban buh sa kawei ka sub station ha Namdong namar ba tang ka Nartiang substation kam lah ban pynbiang bording iaki shnong baroh ka Nartiang Constituency khamtam ki shnong kiba don ha jaka khappud bad ka Assam.

Ka KSU kala kam ba u SE ula ong ba ka don ka jingtyrwa ban buh iaka sub station ba thymmai ha katei ka thain, hynrei kane ka kam kala sahteng. Ka KSU halor kane kala ong ba kan buddien bad kan kyrpad iaki bor ba halor ban buh iaka sub station ba thymmai khnang ban myntoi u paidbah.

Shuh shuh ka KSU haka juh ka sngi kala iakynduh ruh ia u DMHO, West Jaintia Hills ban ujor ha u halor ka jingdkoh treikam ka Namdong PHC. Ka KSU kala daw ban pynbiang doktor bad nongtrei ka aspatal khnang ba kan lah ban ai jingshakri ia u paidbah ka thain.

Ka KSU kala iathuh ba kane ka PHC ka don tang uwei u doktor.