Lockdown: Wanphai 500 tam na ki 2300, katba 987 ki bar Jylla sahkut hapoh East Jaintia Hills

Syllad | The Rising MeghalayaJune 2, 2020

U Deputy Commissioner, East Jaintia Hills District bah FM Dopth ula iathuh ba na ki 2300 ngut ki nongshong shnong ka East Jaintia Hills kiba sahkut shabar kiba la wanphai kila kot palat ïaka 513 ngut. Katba ki bar jylla kiba sahkut hapoh ka district ki don haduh 987 ngut na ki 4281 ngut.

U Bah FM Dopth ula iathuh ki trai shnong kiba sahkut sha ki Jylla bapher bapher ki don haduh 2300 ngut bad ki dei kiba la register haka hapoh ka COVID-19 Registration ka Jylla bad kine kiba la wanphai ruh baroh ki don hapoh quarantine centre.

Katba ki bar jylla kiba sahkut haka East Jaintia Hills ki don 986 ngut kiba naka jylla Uttar Pradesh, Uttarkhand, Tripura bad ki sah ki shong ha ki camp trei bylla bad ki iingwai ba ki shong ki sah. hapoh ka district.

Haba kylli ha kaba iadei bad ka jingpynkhreh ïaka COVID-19 hapoh ka district, u Bah FM Dopth ula iathuh ba ki don ar tylli ki jaka jurip ha Ratacherra bad Umkiang. Kiba wan na kiwei ki lynti ruh kum na Umrangso marsien tip la buddien ban pynrung kyrteng bad hikai ba kin bud ryntih iaki jingbthah jong ka sorkar lyngba ka tnad ka koit ka khiah.

U Dr Fernandez Lamin, District Surveillance Officer, ula iathuh ba ki don ar tylli ki Institutional Quarantine Centre, ha Rymbai Secondary School lah ban pynsah haduh 100 ngut, Holy Cross Secondary School Umkiang 20 ngut bad 65 tylli ki Community Quarantine haki shnong bapher bapher.

Ka Corona Care Centre ha Deinchynrum ka don 25 jingthiah bad ka Rymbai PHC 10 jingthiah naka bynta ki kynthei. Nalor ki Isoalation centre la buh ha CHC bad PHC, ula ong u Dr Lamin.

U Bah FM Dopth, ula ong ba kiba la wanphai ki dei na Chennai, Kerala, Maharastra, Delhi bad kito kiba wan phai dalade, lada kim dei kiba la register bad pynrung kyrteng hapoh ka COVID-19 Registration ka Jylla la buddien bad jurip iaki.

Ki shnong ki thaw ki ai ka jingiatreilang bad ka tnad ka koit ka khiah bad ka bor synshar district bad ki ASHA ki ANM ruh ki buddien ia baroh kiba hap ban shongset hapoh iing.