Lok Sabha Election: 19 tarik Iaiong yn thep vote ha Meghalaya

Syllad | The Rising MeghalayaMarch 16, 2024

Ka Election Commission of India haka sngi Saitjain ka la pynbna ba ka jingiathep vote na ka bynta ka ilekshon Lok Sabha ha Meghalaya kan long ha ka 19 tarik u Iaiong u ban wan.

U Chief Election Commissioner ka Election Commission of India u Rajiv Kumar u pyntip ba yn pynlong ia  ka ilekshon MP Lok Sabha hapoh ka Ri ha ki 7 tylli ki bynta ne phase, kata ha kaba ka Meghalaya kaba don artylli ki seat, ka Shillong bad ka Tura ka hap ha ka kylla kaba nyngkong.

Ka tarik ba khatduh na ka bynta ka jingthep kyrteng kan long ha ka 27 tarik mynta u bnai bad ka tarik ban weng kyrteng kan long 30 tarik Lber 2024.

Ka  jingiathep vote ha ka kylla kaba ar kan long ha ka 26 Iaiong, kaba lai ha ka 7 Jymmang, ba saw ha ka 13 Jymmang, ba 5 ha ka 20 Jymmang, 6 ha ka 25 Jymmang bad ka kylla kaba 7 ha ka 1 tarik u Jylliew 2024. Ka tarik ban niew ia ki vote kan long ha ka 4 tarik Jylliew 2024.

Ka Meghalaya kan leit sha ka jingiathep vote ha kane ka kylla kaba nyngkong ha ryngkat kiwei pat ki Jylla kiba kynthup ia ka Arunachal Pradesh, Andaman & Nicobar Island, Andhra Pradesh, Chandigarh, Dadra and Nagar Haveli and Daman and Diu (DNH&DD), Delhi, Goa, Gujarat, Himachal Pradesh, Haryana, Kerala, Lakshadweep, Ladakh, Mizoram, Meghalaya, Nagaland, Puducherry, Sikkim, Tamil Nadu, Punjab, Telangana, Uttarakhand, Karnataka, Rajasthan, Tripura, Manipur, Chhattisgarh, Assam, Odisha, Madhya Pradesh, Jharkhand, Maharashtra, Jammu & Kashmir, Uttar Pradesh, Bihar bad West Bengal.

U CEC u pyntip ruh  ba ki don haduh 96.8 klur ngut ki nongthep vote ha ka ri India bad 49.7 klur ki dei ki shynrang bad 47.1 klur ki dei ki kynthei.

Ha kajuh ka por u la pyntip ruh ba ka Model Code of Conduct (MCC) mynta ka la treikam hapoh ka Ri baroh kawei.