Lok Sabha Election: 2.2 million ki nongthep vote ka jylla, yn pyrkhing bha iaka MCC, ong CEO

Syllad | The Rising MeghalayaMarch 17, 2024

U Chief Election Officer (CEO) ka Jylla BDR Tiwari u la pyntip ba ka Model Code of Conduct (MCC) mynta ka la treikam pura ha Meghalaya hadien ka jingpynbna ia ka tarik ilekshon sha ka Lok Sabha 2024, bad na ka liang ka Tnat Ilekshon kan pyrkhing bha ia ka MCC khnang ban lah ban pynlong ia kane ka ilekshon kaba khuid bad kaba iaid beit iaid ryntih.

U CEO u pyntip ruh ba ka Meghalaya ka don ha ka kylla ne phase kaba nyngkong ha ka jingpynlong ia kane ka ilekshon ha kaba kan leit sha ka jingiathep vote ha ka 19 tarik u Iaiong u ban wan katba ka jingniew ia ki vote kan long ha ka 4 tarik u Jylliew u ban wan.

Nalor kata u pyntip ruh ba ka tarik ban pynmih ia ka gazette notification kan long ha ka 20 tarik Lber katba kasngi ba khatduh ban thep kyrteng kan long ha ka 27 tarik Lber.Ka jingbishar ia ki kot ki sla kan long ha ka 28 tarik Lber bad ka tarik ba khatduh ban weng kyrteng kan long ha ka 30 tarik Lber.

Ka samoi jong kane ka 17th Lok Sabha kaba 17 kan kut ha ka 16 tarik u bnai Jylliew 2024.

Da kaba pynpaw ba yn pynkhing halor ka jingpyntreikam ia ka MCC ha ka jylla, u CEO u la ong, “Yn shim ia ki jingpynshitom lada don kiba pynkhein ia ki kyndon ka MCC. Yn ym lah shuh ban pynbna ne wanrah ia ki skhim ne ki jingtrei bathymmai. Hynrei lada don ki jingpyntrei kiba la iaid shakhmat kine ki lah ban bteng ia ka kam.”

U pyntip ruh ba kino kino ki jingthoh ne ki jingtah postar yn sa weng noh hapoh ka 24 kynta bad 48 kynta hadien ba la pynlong ia ka ilekshon. U la bynrap ruh ba ki la shim ia baroh ki sienjam ban pynthikna na ka bynta ka jingpynlong ia ka ilekshon kaba khuid, kaba iaid beit iaid ryntih, ka ban ioh iashim bynta da baroh bad kaba suk ba sain.

U CEO u la ong ruh ba kin pynkhlain ha kaba iadei bad ki bor pahara khnang ban pynthikna ia ka shongsuk shongsain.U la bynrap ruh ba ki la dep ruh ban ithuh ia ki polling station kiba lah ban mih jingkulmar bad kiba don jingman da kaba shim lypa ia ki sienjam kiba donkam.

Haba kylli, u Tiwari u la ong ba ka ECI ka la ai ka jingbthah sha baroh ki tnat ka sorkar pdeng na ka bynta ban pyrkhing ia ka jingpahara ha ki jaka khappud lyngba ka Tnat shipai BSF bad kiwei pat ki Tnat pahara.

Nalor kata u CEO u la ong ba ki lashim ruh ia ki sienjam ban pynthikna ia ka jingmih shakhmat jong ki paid nongthep vote ha kane ka ilekshon Lok Sabha ka ban wan.Katkum ka jingsngew ka jong u, u la ong ba ka long kaba shem jingeh namar ka jingmih jong ki nongthep vote ka Duna bha ha ki MP ilekshon haba ia nujor bad ki Assembly ilekshon.   

Nalor kata u la ong ruh ba ka Meghalaya ka don  22,17,100 ki nongthep vote ha kaba 10,94,947 ngut ki dei ki shynrang bad, 11,22,150 ki kynthei bad laingut ki third gender ne kiba iakhleh kynthei shynrang. U la ong ruh ba ka la don ka jingkiew kaba 55,971 vote ha kine ki shi snem ba la dep, kata naduh u 2023-2024.

Shuh shuh u la ong ba ki don haduh 3835 ngut ki nongthep vote kiba dei ki service voters, 11,179 ki briew kiba don jingduna ha ki dkhot met, 23,793 ki nongthep vote kiba la kynjoh palat 80 snem rta, 10,345 ki nongthep vote kiba la palat ia ka 85 snem, 5 ngut ki NRI katkum ka electorally roll kaba khatduh ba l pynmih ha ka 5 tarik u Kyllalyngkot 2024.

Ka Jylla ka don baroh haduh 3512 tylli ki polling station ha kaba 326 tylli ki dei kiba don ha ki jaka sor bad 3186 tylli ha ki thain nongkyndong..