Lok Sabha Election 2024: Ki don 72.33% ki nongwan thep vote ha Meghalaya

Syllad | The Rising MeghalayaApril 20, 2024

Ka Jylla Meghalaya ha ka 19 tarik Iaiong, ka la sakhi ia ka jingwan iashim bynta jong ki 72.33% ki nongthep vote sha ka election Lok Sabha na ka bynta ki artylli ki parliamentary constituency, kata ka Shillong bad Tura.

Ka jingdon jong ki nongwanthep vote mynta ka kynti la khmih lynti ba kan kham bun shuh shuh ban ia ka MP Election kaba la long ha u snem 2019 kaba long 71.42% katba mynta ka kynti kala kynjoh sha ka 72.33% haduh ka por 7 baje mynmiet.

Baroh ki don 10 ngut ki kyrtong kiba ia aireng ha kane ka ilekshon ha kaba 6 ngut ki na Shillong parliamentary constituency bad 4 ngut na Tura parliamentary constituency.

“Ngin dang ioh ia ka percentage kaba khatduh ka jingwan poi jong ki nongthep vote ha ka jylla hadien ba ngi la ioh pdiang ia ka jingkhein kaba pura bad ngi khmih lynti ba kan nangkham kiew,” ong u Chief Electoral Officer (CEO) Dr BDR Tiwari haba iakren sha ki lad pathai khubor.

Watla katta u la ong ba ka percentage ka jingdon jong ki nongwan thep vote ha Shillong parliamentary constituency ka kham kiew hynrei ha Tura ka kham duna.

“Haduh ka por 5 baje janmiet, ka jingdon jong ki nongwan thep vote ha Shillong ka long 70.26% bad Tura 69.31%, ” u la ong da kaba bynrap ba ha u snem 2019, ka percentage jong ki nongwan thep vote na ka bynta ka Tura ka long haduh 81.38% bad ka Shillong tang 65.48%.

Haba pynpaw ia ka jingkmen halor ka jingiaid beit ha ka jingpynlong ia kane ka ilekshon khlem kino kino ki jingjia, u CEO u la ong, “Nga sngewkmen shibun bad ka Lok Sabha ilekshon kaba 18 ka la long kaba iaid beit iaid ryntih hapdeng ka suk ka sain. Kim shym la don kino kino ki jingjia sha kino kino ki jaka,” u la ong.

U la pyntip ruh ba ha baroh ha ka por ba la pynlong ia ka mock poll bad ha ka polling, 47 tylli ki BU, 34 CU bad 109 ki VVPATs la dep ban bujli noh da kiwei bad ia kiba la lah ban pyndep ha ka por kaba biang.U la ong ruh ba ia ka webcasting la leh ia kumba 1886 tylli ki polling station ban khmih bniah ia ka rukom pyniaid ia ka ilekshon.

Kumjuh ha kaba iadei bad ki jingpynkhein ia ka Model Code of Conduct (MCC), u Dr Tiwari u la ong, “Ngi la ioh jingtip halor kane bad na ka liang u Returning Officer jong ka Shillong u la shimkhia halor kane ka bynta. U la ong ruh ba la dep ban ujor da ka ejahar, bad u RO u la shim ia la ki jong ki sienjam kiba tyngeh.

Ia kane u la pynpaw halor ki jingjia ha kaba uwei u nongthep vote u la shondur ia ka EVM machine ban pyni ia ka jingkyrshan ka jong u na ka bynta ka party sain pyrthei bad uwei uba rah ia ka shap jong kawei pat ka party ha ka por ba leit thep vote.

Haba kylli hato ia kiba kum kine ki vote yn khein ki bym treikam, u CEO u la ong, “Ka long kaba shem shitom, hynrei hadien ba ngi la bishar bniah ia kane ka bynta ngin sa shim ia ki sienjam kiba dei ban leh.”

Nalor kata u la ban ruh ba ka Model Code of Conduct kan dang bteng ban treikam tad haduh ka sngi ban pynbna ia ka result jong kane ka Lok Sabha ilekshon ha ka 4 tarik u bnai Jylliew u ban wan.

Ha kajuh ka por u CEO u pyntip ruh ba la pynjur ia ka jingpahara na ka bynta ki 13 tylli ki strong room ha ki 12 tylli ki district bad ha kawei ka Civil Sub Division.

Shuh shuh u la ong, “Haduh 7 kompeni ki bor pahara CAPF kin don bynta ha ryngkat ki bor pulit ban pynkhreh ia ka plan ba pura ha ryngkat ka jingiasyllok bad ki Deputy Commissioner bad SDO, kumta baroh ki jingdonkam la dep ban pynbiang na ka bynta ban pahara ia ki Strong Room. Ki don 13 tylli ki Strong Room 12 tylli ki don ha ki District Headquarters bad 1 ha Sohra Civil Subdivision.”

Katkum ka jingpynpaw ka jong u la ong ruh ba ka jingniew ia ki vote ruh kan long ha baroh ki 13 tylli ki jaka.