Lok Sabha Election: Pyllait ka RDA ia ka mat treikam, kular buddien ia ka ILP, Ktien Khasi bad kam khappud

Syllad | The Rising MeghalayaApril 9, 2024

Ka Regional Democratic Party (RDA) kaba dei ka kynhun synrop jong ka UDP bad ka HSPDP haka 9 tarik Iaiong, ka la pyllait paidbah ia ka mat treikam (Manifesto) jong ka na ka bynta ka Ilekshon Lok Sabha 2024 ha ryngkat ka jingkular ban buddien bad ka sorkar Pdeng na ka bynta ban dawa pyntreikam noh mardor ia ka Inner Line Permit (ILP), ban kynthup ia ka Ktien Khasi bad Garo ha ka Khyrnit ba Phra bad ban pynbeit ia ki jingeh kiba iadei bad ki kam iakajia pud bad ka Assam.

Ka RDA ka kular ruh ba lada ka shah jied shapoh Parliament kan buddien ia ka jingtyrwa ban pynkylla ia ka Sixth Schedule na ka bynta ban kynthup ia ka jingpynkylla ia ka para 3 jong ka Sixth Schedule ka ban pynthikna ia ka kyntien “President” ban bujli da ka kyntien “Governor” ha ka para 12 A(b) jong ka Sixth Scheule, kaba ong ba ki ain bala mynjur da ka Parliament bad ki State Legislative Assembly kin ym treikam ha ki jaka riewlum ha kaba iadei bad ki rukom jingleh jingkam tynrai, ki ain riti dustur, ki jingleh niam, ki iingkashai Civil bad criminal, ki Dorbar Shnong, ka khyndew ka shyiap, ka khlaw ka btap bad ki marpoh khyndew.

Kane ka manifesto kaba don 25 tylli ki mat ba pyllait da u president ka UDP u Bah Metbah Lyngdoh ka kular ruh ban pynkhlain ia ki Autonomous District Council (ADC) kumjuh ruh ban kyrshan ia ka jingiakren iasuk ba don jingmut bad ka Seng kieng atiar  Hynniewtrep National Liberation Council (HNLC).

Ka la ong ruh ba kan bteng ban buddien halor ka jingdawa ban pyntreikam ia ka ILP bad ban shim ia baroh ki sienjam ban iakren  halor ka bynta kaba iadei bad ka kam ker sainar ha khappud kumjuh ban pynkha ia ka Police Border Wing. Kumjuh ka la kular ruh ban buddien ban ioh pynrung ia ka Ktien Khasi bad Garo ha ka Khyrnit ba phra jong ka Riti synshar Ri bad ruh ban pynlong ia ka Ktien Khasi bad Garo kum ka Qualifying language, kata nalor ka ktien English bad Hindi haba phai sha ka jingthungkam thung jam ha ki ophis ka sorkar pdeng hapoh kane ka Jylla.

Nalor kata ka RDA kaba la pynieng iakhun da u Bah Robertjune Kharjahrin kum u kyrtong ha kane ka Lok Sabha Ilekshon na Shillong Seat ka la kular ruh ha ka mat treikam jong ka ba kan shimkhia ruh ban pynthikna ba ka jingker sainar shiah ha ki bynta khappud jong ka ri ka dei ban long napoh zero-line bad ruh ban siew ia ka bai lutksan sha kito ki briew kiba la hap ban duh noh ia ki jaka puta shapoh Bangladesh.

Ka la ong ruh ba ka RDA kan shim ia ki sienjam ban kyntu ia ka sorkar India ba ka dei ban pynbeit noh ia kam iakajia pud hapdeng ka Assam bad ka Meghalaya kumba la kdew hapoh ka Sixth Schedule jong ka Riti synshar Ri ne Constitution jong ka Ri India.

Halor ka ioh kam ioh jam, ka RDA ka la ong ba kan pynthikna ba ki samla ka Jylla ki dei ban ioh ia ka jingphaikhmat bad ban don ruh ia ka National Youth policy bad ka National Sports Policy.

Kumjuh ka RDA ka ban jur halor ka jingdonkam ban thaw ia ka Special Economic Zones (SEZ) na ka bynta ban kyntiew ia ki kam bei tyngka bad ban kyntiew ia ka ioh ka kot, ban khmih na ka bynta ka bha ka miat jong ki paid nongrep kumjuh ruh ban kyntu ia ka sorkar India ba kan pynhap ia ki nonghikai bad ki staff na ka bynta ki Eklaya Model Residential School katkum ka State Reservation Policy.

Ka RDA ka la pynpaw ruh ba kan bishar bniah ha kaba iadei bad ka National Education Policy (NEP), ka Three-Language Formula, CUET, ban kyntiew ia ka bhah kyrpang ia ki seat ha ki Technical and Higher Education, ban wanrah ia ka Engineering bad medical colleges, ban wanrah ia ki Coaching Institutes na ka bynta ki competitive exams and Skill Development Centres ha man la ki district.

Shuh shuh ka manifesto ka la ong ba ka RDA kan ieng ban aijingiada ia ki hok halor ka jingngeit niam jong ki rit paid bad ban pyrshah jur ia ka Uniform Civil Code (UCC), ka ain pyrshah pynkylla niam bad ruh ban don ia ki kyndon ain ba pyrkhing ki ban pynshitom  ia kito kiba leh ia ki kam bymman pyrshah ia ki Khristan lem bad kiwei pat ki niam rit paid kumjuh ban pyllait pura na ka jingpyntreikam ia ka  CAA ha Meghalaya bad kiwei kiwei nalor kiwei kiwei pat ki bynta.