Lok Sabha Election: Yn buh ia ki dur jong ki kyrtong ha ki EVM Ballot Paper

Syllad | The Rising MeghalayaMarch 18, 2024

Khnang ban pynsuk ia ki paidbah nongthep vote ba kin ithuh ia ki kyrtong, ka Election Commission of India ka la shim sa kawei pat ka sienjam, kata ban buh ne print ia ki dur jong ki kyrtong ha ki Ballot Paper ia kiba yn buh ha ki EVM (Ballot Unit) kumjuh ha ki Postal Ballot Paper.

Katkum ka khubor ba la pyllait ha ka 16 tarik mynta u bnai, ka Commission ka pyntip ba kane ka sienjam kan iarap ia ki nongthep vote ba kin lait na ka jingartatien kaba lah ban wan jia lada ki kyrtong ki don ia ki juh ki kyrteng ne kiba ki kyrteng ki iasyriem na kajuh ka constituency.

Ka Commission ka pyntip ruh ba na ka bynta kane ka kam, ki kyrtong ki donkam ban phah sha ki Returning Officer ia ki dur stamp size kiba dang shen jong ki, kata katkum ki jingkdew ba la buh beit da ka Commission.

Nalor kata ka Commission ka pyntip ruh ba kumba ju long, kan don ruh ka lad ban nion ha u budam ne button ‘None of the Above’ (NOTA) na ka bynta ki nongthep vote.

Ha ka Ballot Unit, kata ha trai jong ka kyrteng ba khatduh jong ki kyrtong, un don u budam na ka bynta ban nion ia u NOTA khnang ba ki nongthep vote ki bym kwah ban vote ia kino kino ki kyrtong ki lah ban jied da kaba nion ia u budam ne button NOTA

Shuh shuh ha ki Postal Ballot Papers ruh kan don ka NOTA Panel hadien ka kyrteng jong ki kyrtong kiba don hatrai eh.Ia ka shap ne symbol jong u NOTA yn print ha ka NOTA Panel. Shi bynta jong ka SVEEP kin don ruh ki awareness programme ban pynshai ha kaba iadei bad kine ki sienjam sha nongthep vote bad sha baroh kiwei pat ki kynhun kiba don bynta.