Lok Sabha Elections: Yn rai ki 22.26 lak ngut ki nongthep vote ia ka jop ka rem jong ki 10 ngut ki kyrtong na ki 2 seat

Syllad | The Rising MeghalayaApril 18, 2024

Ka 19 tarik Iaiong,  kan dei ka sngi kaba kongsan tam ha ka jingpynlong ia ka Lok Sabha ilekshon na ka bynta ki artylli ki seat ha Meghalaya – kata na ka bynta ka Shillong parliamentary constituency bad ka Tura parliamentary constituency kaba don hynriew la sawngut ki kyrtong ha ka rynsan.

Ka jingiathep vote kan sdang naduh ka por 7 baje mynstep bad kan kut ha ka por 4 baje janmiet jong ka 19 tarik Iaiong 2024.

Ki don haduh 22,26,567 ngut ki nongthep vote ha kaba 10,99,517 ngut ki dei ki shynrang bad 11,27,047 ngut ki dei ki kynthei bad 3 ngut ki third gender ki ban pyndep ia la ki jong ki hok ha ki 3512 tylli ki polling station na ka bynta ban jied ia ki nongialam bathymmai jong ki, ki ban leit mihkhmat ia ki na ki artylli ki constituency sha ka Parliament.

“Ngi la long kiba la pynkhreh na ka bynta ban pynlong ia ka jingiathep vote lashai ka sngi 19 tarik,” ong u Chief Electoral Officer (CEO) u Dr BDR Tiwari haba kren sha ki lad pathai khubor hynne ka sngi Palei.

U la pyntip ruh ba ki don baroh 40 kompeni ki bor pahara central armed police force (CAPF) ki ban khmih ban pynthikna na ka bynta ka ilekshon kaba iaid beit iaid ryntih bad kaba suk ba sain.Na kine 26 ki dei ki CRPF- 6 ki BSF -4 ki SSB bad 4 ki bor pahara RPF.

“Ngi la thikna ba ka jingpynlong ia kane ka ilekshon kan long kaba iaid beit iaid ryntih bad kaba suk ba sain,” bynrap u Tiwari.

U la ong ruh ba ki don 14048 ki dkhot ki ban pyniaid ia ka jingiathep vote ha baroh ki 3512 tylli ki polling station ha baroh ki artylli ki parliamentary constituency.

U CEO u la ong ruh ba ki don 31,247 ngut ki nongthep vote kiba nyngkong eh ne ki ‘first time voters’ 11,740 ki briew kiba don jingduna ha ki dkhot met.  Na ki 3512 ki polling station, 3186 ki dei kiba don ha ki thain nongkyndong bad 326 ha ki jaka sor.

U Tiwari u la ong ruh ba ki don 409 tylli ki polling station kiba don jingma na ka jinglah ban mih jingklumar bad 29 tylli ki polling station kiba kham shongsyier, bad ki don 187 tylli ki polling station kiba don ha ki jaka khappud bad ka Assam bad 147 ha ki bynta khappud bad ka ri Bangladesh.

Ha Shillong parliamentary constituency, ka polling station kaba don bun eh ki nongthep vote ka dei ka 17-Nongspung ha 33-Rambrai Jyrngam kata 1274 ki nongthep vote katba ka polling station kaba don duna tam ki nongthep vote ka dei ka 82-Kamsing ha Amlarem bad ka 56-Photeitsim ha Ranikor kiba don tang mar 36 ngut ki nongthep vote.

Ha Tura parliamentary constituency, ka polling station kaba don bun eh ki nongthep vote ka dei ka 12-Chandmary ha North Tura kata 1324 ngut ki nongthep vote bad ka polling station kaba duna tam ki nongthep vote ka dei ka 53-Narigre in Williamnagar kata 85 ngut ki nongthep vote.

Nalor kata u Tiwari u la ong ba ka constituency kaba bun tam ki nongthep vote ka dei ka Mawlai, kata 50954 bad kaba don khyndiat eh ka dei ka Dalu, kata tang 22398.