Long la khreh ka KSU ban leit phatok lada lehbor ka Sorkar ban wanrah lynti rel

Syllad | The Rising MeghalayaMarch 21, 2025

Ka Khasi Students’ Union (KSU) haka 20 tarik Lber ka la ong ba da ki hajar ngut ki dkhot ka seng kim salia ban leit phatok lada ka sorkar kan pyrshang ban leh borbah ban wanrah ia ka lynti rel ha Rilum Khasi Jaintia katba ym pat don ia ki ain iada mynder kum ka Inner Line Permit (ILP).

“Katba ngi dang iakhun ban ioh ia ka ILP, hynrei kynsan ki la wanrah da ka jingtyrwa ban wanrah lynti rel. Kumta ngi phah ia ka khubor kaba jam bad kaba shai ban ym pynbitar ia ka KSU namar ngi kwah ban pyntreikam mardor ia ki ain kiba khlain ban iada ia ki hok bad ka bha ka miat jong ki paid Khasi,” ong u President ka KSU u samla Lambokstarwell Marngar haba kren ha ka jingrakhe ia ka jingdap 47 snem jong ka seng.

U la ong ruh ba ka sorkar ka la dep ban mynjur ia ka resolution ban pyntreikam ia ka ILP, hynrei ka long kaba sngewsih ba kane ka kam ka la shu sahteng ha ka jingshim rai jong ka Sorkar Pdeng.

Une u nongialam ka KSU u la buh ruh ka jingkylli halor ka jingpulom jong ka sorkar ban pyntreikam ia ka Meghalaya Residents Safety and Security Act (MRSSA), 2016 bad ong, “Ki paidbah kim dei tang ban shu kylli kaei kaba ka KSU ka leh ban iada ia ka jaidbynriew Khasi, hynrei ki dei ruh ban kylli ia ki nongthaw ain kaei kaba ki la leh halor kane haba la jied ia ki ban thaw ia ki ain ban iada ia ki trai ri trai muluk.”

U samla Lambokstarwell u la pynkynmaw ruh ba ka dei ka lynti iaid kaba eh bad kaba bun ki jingtynjuh ia ka seng ha kine ki 47 tylli ki snem kiba la leit noh bad ong, “Ngi la mad ia shibun ki jingeh jingtynjuh haba ngi shim ia kino kino ki mat kiba ktah ia ka jaidbynriew trei muluk ka jylla.”

Nalor kata u la kynnoh ruh ba la ka dei ka sorkar Jylla ne ka sorkar Pdeng ki la pyrshang ha kiba bun ki khep ban phiah bad pynpait pynpra ia ka KSU.

“Ha u 2007-2009 ka la don ka jingpyrshang ban phiah ia ka KSU namar ka mat kaba iadei bad ka kam tih uranium, kata ym tang lyngba ka jingpyndonkam da ka bor pisa, hynrei wat haduh u pud ban pyrshang ban shim ia ka jingim jong ki nongialam ka KSU. Kumta, ngi la don hangne ban pynkynmaw ba ka KSU ha kine ki 47 tylli ki snem ba ka la aijingshakri ka ieng skhem ha ka nongrim na ka bynta ka dawbah ban iada ia ki hok bad ia ka bha ka miat jong ka jaidbynriew.”

Ia ka KSU la seng ha ka 20 tarik Lber 1978 da ka kynhun ki samla pule kiba angnud ban wanrah ka jingiatylli hapdeng ki samla kiba dei ki Khynriam, Pnar, Bhoi, War, Maram, Lyngngam bad Diko.