Long lakhreh ka Meghalaya lada wan jia ki jingkhynniuh jumai ba jur; shim nuksa na ka jingjia ha u snem 1897 lyngba ka mock drill

Syllad | The Rising MeghalayaOctober 13, 2023

Ka jylla Meghalaya ka la long kaba la pynkhreh lada jia ka jingkhynniuh u jumai bajur lane kino kino ki jingjia shah pynjulor ha ki bor mariang lyngba ka jingpynlong ia ka mock drill ha baroh ki district jong ka jylla haka sngi Palei.

La pynlong ia kane ka mock drill kum ka jingpynkhreh ia ki lad aijingiarap lada jia ka jingkhynniuh jumai bajur da kaba shim nuksa ruh lyngba u jumai bah uba la khie ha ka snem 1897, kata khamtam namar ka Meghalaya ka hap hapoh kata ka Seismic Zone – V  lane ka jaka kaba khie jumai khah khah.

Kumba long ha kiwei pat ki district ka jylla ha ka nongbah Shillong ruh la sdang ia kane ka mock drill lyngba ka jingpynriew ia ka siren kaba long kum ka dak ka jingpmaham ia ki paidbah nongshong shnong ba kin long kiba la pynkhreh  halor ki jingma na ka jingkhynniuh u jumai ba jur.

La pynlong ia kane ka mock drill ha ka lynti surok ka thain Polo bad ki lynti surok na Polo sha Wahingdoh, Polo Super Market, ki dukan kiba don ha ka thaiñ Polo, Hotel Polo Towers, SBI building, Polo bad MeCEL, Lumjingshai, Samkhamti Petrol Pump, Urkaliar, Female Health Worker, School of Nursing and School of Nursing, TTC, Ganesh Das Government Hospital, Lawmali, St. Xavier’s School, Polo, Pynthorumkhrah Golflinks Higher Secondary School bad Shillong Secondary School, Forest Colony.

Ha kaba iadei ba kane la pynkhreh ruh ia ka Incident Command Post, Medical Camp, Staging area, Relief Camp, Base Camp  ha SRGT Parking lot bad hapoh madan 3rd Ground Polo.

Ha kane ka sngi la wan ban iashimbynta da ki bor pyniaid District, ki shipai, ki pulit, NDRF, SDRF, Fire and Emergency Services, Hospitals, Skul, College, ki kynhun sengbhalang, nongshong shnong, ki dkhot ka Bharat Scouts and Guides, Indian Red Cross Society, NSS, Aapda Mitra bad kiwei kiwei.

Hadien ba la pyndep ia kane ka Mock Exercise la pynlong ruh ia ka jingialang hapoh State Convention ha ka jingiadon lang u  Chief Secretary ka jylla u Bah DP Wahlang kum u Kongsan.

Ha ka jingkren u Bah Wahlang u la ai khublei ia baroh ki kynhun kiba ia don bynta ha kaba pynlong ia kane ka Mock Exercie kaba seisoh bad pyntip ruh ba hadien khyndai snem ka Meghalaya ka la lah ban pynlong ia kaba kum kane ka Mock Exercie kaba heh, kata da kaba khot ruh ia ka MSDMA ba kan bteng ban pynlong ia kiba kum kine ki Exercise ki ban kynthup ruh ia ki skul bad ki kolej khnang ban long kiba la pynkhreh lada jia kiba kum kine ki jingjia shah pynjulor ha ki bor ka mariang.

Da kaba pynpaw halor kiba bun tylli ki jingjia shah pynjulor ha kylleng ki ri ka pyrthei kiba la wanrah ia ka jingiap jong kiba bun ki mynsiem briew ba lui lui, u Kongsan u la kyntu ruh ia baroh ki kynhun kiba ia don bynta ban long kiba la khreh bad ban pyndonkam ia ka jingshemphang ba la ioh lyngba ka jingpynlong ia ki mock drill lada jia kiba kum kine ki jingjia shah pynjulor.

Nalor kata u CS u la ban ruh halor ka jingdonkam ban kyntiew ia ki lad aijingtip kiba ka Disaster Management Authority ka la don mynta khnang ban lah ban pynbiang ia ki lad jingtip bad ban nanglah ban kyntiew shuh shuh ia ka jingshakri jong ka tnat Disaster Management Authority.