Lum jingialang ka UDP ban pan jingkyrshan ia u kyrtong MP Shillong ha Jowai

Syllad | The Rising MeghalayaMarch 1, 2024

Watla ka Election Commission of India kam pynbna ia ka tarik ban iakhun ia ka eleshon sha iing Dorbar Thawain jong ka Ri India hynrei ki seng sain hima sima ki la sdang khih khoh reh ban pynkhreh ialade na bynta kane ka eleshon khnang ban ioh noh u MP jong la ka jong ka parti.

Mynta ka kynti ka seng United Democratic Party (UDP) West Jaintia Hills District ka la sdang ia la ka jingpynkhreh da kaba ia ka jingiakynduhlang jong ki nongialam bad dkhot nongkitkam na baroh ki 5 tylli ki Constituency ba hap hapoh ka West Jaintia Hills District ha ka 1 tarik Lber hapoh Community Hall jong ka Dorbar Shnong Loomsooiung, Newhill.

Ha kane ka jingialang la donlang u MLA Khliehriat Bah Kyrmen Shylla, MLA Mowkaiaw Bah Nujorki Sungoh, ki MDC ka UDP kynthup u Bah Winning G. Sungoh, Bah Finelyness Bareh, Bah Dawan Lyngdoh, J. Treilang Suchiang bad Lomris Lyngdoh.

Haba pyniaid ia ka jingialang U Bah Lahkmen Rymbui ula ong, ka jinglum lang ka party iaki dkhot nongkitkam ka long ban phylliew jingmut kumno ban pynsngewthuh sha ki paidbah ban aijingkyrshan ia u kyrtong ka kynhun Regional Democratic Alliance (RDA) u Robert June Kharjahrin sha Election Lok Sabha na Shillong Parliamentary Constituency.

Kiwei ki kyrtong ki mih na class room sha u paidbah, katba u kyrtong jong ka RDA udei u samla rangbah uba shakri da ki phew snem iaka ri bad ka jaitbynriew bad u sngewthuh khambha iaka jingeh jingshon jong ki paidbah, kumta ka la dei ka por ban ailad ia u na ka bynta ban long u ksiang ban iasaid iaki mat ba ktah iaka jaitbynriew bad iaki jingdonkam jong ki paidbah Khasi Jaintia, la ong u Bah Lahkmen.

U Kyrmen Shylla u pynpaw ka jingngeit skhem ba ka party UDP haki sngi ban wan kan long hakhmat eh hapoh ka jylla bad ha kata ka por kan long ka jingkyrkhu bad jingmyntoi iaki paidbah khamtam kito kiba ieid bad shaniah iaka party.

Ula ong ka jingiakynduh mynta ka sngi, ka long ruh ban pynkhie im shuh shuh iaka party ha Rilum Jaintia khamtam ha West Jaintia Hills khnang ba ka party kan ioh iaka jingjop ha baroh ki Election kynthup ka MP Election.

Ula ong kiwei ki party ki la ioh ban mihkhmat iaka jylla shapoh Parliament hynrei ka UDP wat la ka pynieng kyrtong man ka Election MP kam pat juh poi haka thong, kumta ula kyntu iaki paidbah Khasi Jaintia ban ailad ia u kyrtong ka RDA ha kane ka kynti ban leit mihkhmat sha Delhi ban wanrah ka jingkylla hapoh ka jylla.

“Ngi don ka jingkyrmen ba u kyrtong ka RDA un leh bha bad ioh iaka jingjop don burom” ong Bah Kyrmen.

U Nujorki Sungoh ula kyntu ba haba jied iaki nongmihkhmat dei ban jied da u briew uba lait ka ktien ka thylliej ban pynsngew shapoh ka sorkar kmie iaka mat bad jingdonkam jong ki paidbah. U pynpaw ruh ka jingkmen ba na ka liang ka RDA ka ioh ia u kyrtong uba kynsai tam bad uba don ka jingsngewkhia na ka bynta ka jingdonkam jong ka jaitbynriew.

Ha kane ka jingialang u Bah Nujor ula ai jingmut ruh ban thaw da kawei ka Special Committee kyrpang na ka bynta kane ka Election MP 2024.