Lum jingialang u Myntri bad ki Dorbar Shnong ka West Shillong halor u drok

Syllad | The Rising MeghalayaSeptember 10, 2024

U Myntri ka Tnad Social Welfare u Bah Paul Lyngdoh haka 9 tarik Nailur u la khot pynlong ia ka jingialang bad ki 10 Dorbar Shnong jong ka West Shillong Constituency bad pynthikna ban shim ia ki sienjam ha kaba iadei bad ka jingkynrei jong u drok hapoh ki shnong ki thaw.

Hadien ka jingialang u Bah Paul u la pynpaw sha ki lad pathai khubor ba ha kane ka jingialang la iakren halor kiba bun ki mat kiba iadei bad ki kam khaii drok hapoh ki shnong ki thaw khamtam ha Lumsohphoh, Upper Mawprem bad ka Mawbah bad ha kiwei kiwei pat ki bynta jong ka nongbah Shillong.

U Myntri u la ong, “Haba phai sha ki kam khaii drok, la pynpaw shai ba ka don ka jingduna jong ki briew ki ban iarap ban tehlakam. Na ka liang ka sorkar ka la pyrshang ban leh ei ei halor kane ka mat lyngba ka jingpynrung kam hapoh ka Tnat pulit, bad ngi khmih lynti ba ngin sa ioh kham bun shuh shuh ki pulit ki ban sa leit sha kito ki jaka bapher bapher kiba u drok u kham jyllei.”

Nalor kata u Bah Paul u la pynpaw ruh ba ki la don shibun ki jingai jingmut ha kane ka jingialang, kata kaba kynthup ia ka jingpynhap ia kine ki jaka hapoh ka MRSSA 2016 na ka bynta ka jingpynrung kyrteng mardor ia ki nongshong shnong jong ka thain.

Kumjuh u pyntip ruh ba ka jingialang ka la shim ruh ia ka rai ban thaw noh da ka Village Defence Party (VDP) ha kine ki Dorbar Shnong.

“Ia mynta hi ki don 17 tylli ki VDP ha kylleng ki shnong hapoh ka nongbah Shillong, hynrei da lade hi nga la kyrpad ia ki Dorbar Shnong ba kin pyntreikam ia ka jingkyrpad jong ngi ban thaw ia ki VDP ha la ki jong ki shnong ki thaw,” u la bynrap.