Lum ka tnad pynroi sor ïa kiba shong die ha surok ban pynshai ïaka hok jong ki

Syllad | The Rising MeghalayaAugust 1, 2019

JOWAI: Ka tnad pynroi sor- ka Urban Planner Office, West Jaiñtia Hills District ha ryngkat ka jingatreilang bad ka Society for Urban & Rural Empowerment (SURE) bad ka Jowai Municipal Board kila lum ïa baroh ki nongkhaii ba shongdie ha surok ha sor Jowai ban pynsngewthuh paidbah ïaka hok kaba ki dei ban ïoh.

Ïa kane ka jingpynshai paidbah la pynlong ha District Library Auditorium, Mynthong Jowai haka sngi Palei. La wan ban ïashimbynta da ki spah spah ngut ki nongkhaïi kiba die jingdie ha madan, rud surok naduh ki nongdie soh, kwai, jhur, jingbam tynrai, nongdie jain, slipper bad kiwei kiwei.

Ka kong Larissa Mawroh, State Mission Manager, NLUM kala batai pynshai ïaka hok ba ki nongshong die madan ne surok ki die ban ioh myntoi, kata naduh ka lad kyrshan pisa ban pynheh pynïar ïaka kam ban shngaiñ ka khaii pateng bad ka kamai ka kajih jong ki.

Kala ong ba ki nongkhaii ba die ha madan ne surok ha sor ki dei ban pynrung kyrteng ïalade haka Town Vending Committee katkum ka aiñ “Street Vendors (Protection of Livelihood and Regulation of Street Vending) Act.” Lyngba kane ka commitee ki nongshong die madan ne surok kin ioh ka certificate ban shongdie jingdie bad kin ïoh ruh ka lad jingiarap na sorkar ba kyrshan ïaki.

Nalor kata ka kong Larisa kala ong ba ka aiñ Street Vendor ne ka jingdie ha surok lane madan, lyngba ka NLUM kaba la sdang naduh u snem 2013 da ka Ministry of Housing and Urban Affairs ka phai khmat kumno ban ïarap ïaki briew ba duk bad ai jinghikai ïaki ha kano kano ka kam kaba tbit khnang ba kin ïohkam ïohjam bad ban ieng hala ki jong ki kjat bad kumjuh ka jingiarap ban ïoh ka ram na bank.

Kane ka Mission ka thong ka jong ka ka dei ban pynïoh ïingsah ïa ki bym don ïing bad bad ka peit ruh ïaki jingeh jong ki nongkhaii ba shongdie ha surok ne madan ha ki jaka sor ïarap iaki ba kin ioh ka jingithuh bad ban ai ïaki ka jingiada khnang ba kan nym shah ktah ka kamai ka kajih jong ki.

Hashuwa ka Kong Larisa la ïoh jingkren na ka Kong Rimaya Manner, Chairperson Town Vending Committe kaba long ruh haka juh ka por kum ka Chief Executive Officer, Jowai Municipal Board kaba la batai pynshai ïaka aiñ ‘Street Vendors (Protection of Livelihood and Regulation of Street Vending) Act.

Ka Rimaya kala ïathuh ba kane ka ain ka dei ka atiar ban ïada ïaka hok jong ki nongshong die madan surok kumjuh ki don ruh ki kyndon ba kane ka aiñ ka kdew shai ba ki nongshong die surok ki dei ban long kiba lehkhuid ha ki manla ki jaka ba ki shong die jingdie.

Ka Kong Manner ka kyntu ïaki nongshongdie jingdie ha madan surok ba haba ki don kino kino ki jingeh ki lah ban wan mih ha ophis treikam jong ka ba kin ïoh jingshai ba bniah halor kane ka ain bad ki lad jingmyntoi.