Lum u MLA ka Mawhati iaki nongialam shnong ban shim rai halor ka surok Mawrong
Ha kaba iadei bad ka jingpynslem jong ka sorkar Jylla ban mang pisa noh na ka bynta ban shna pynbha ia ka surok Mawrong, na ka liang u bah Charles Marngar MLA /MDC ka Mawhati Constituency ha ka 24 tarik mynta u bnai u la lum ia ka jingialang jong ki nongialam shnong jong ki 15 tylli ki shnong kiba hap hapoh ka Mawrong Road Area lem bad ki 5 tylli ki shnong kiba don sha ka thaiñ Mawtari Thaïang kiba ju pyndonkam ïa ka surok mawrong ha ka leit ka wan.
Ha kane ka jingialang ba la pynlong hapoh ka ïingdorbar hall jong ka Shnong Rtiang, Ribhoi District, la ïoh ban ïathir ïatai sani bha halor katei ka mat, ha kaba la ïoh ruh ban pan jingmut na ki nongïalam shnong kiba la leit pat ban jurip ïa katei kla surok ha ki bynta kiba la kham sniew kaba sdang naduh ka bynta ba kut ka surok rong ka shnong Rtiang bad kaba kut haduh ka shnong Nongsangu kaba don ia ka jingjlan kumba 25 Km ei ei.
![](https://www.syllad.com/wp-content/uploads/2024/09/JIT-Vacancy-823x1024.avif)
U MLA/MDC ka Mawhati u la ïathuh ba ha ka 6 tarik Risaw jong u snem ba la leit u la dep ban ïa kynduh ïa u Myntri jong ka tnad PWD Road u bah Prestone Tynsong ha ryngkat ka jingthoh ban kyrpad na u ban pynmang skim noh ïa une u surok, ha kaba na ka liang u bah Prestone u la iathuh, ba ia ka surok Mawrong la dep ban pynrung ha ka Scheme PMGSY ha ka Phase-3, bad la khmih lynti ba yn ioh noh ia ka surok naduh ki Bnai tlang jong u snem ba la dep, hynrei haduh mynta ym pat iohi wat tang ia ka Sunction Order jong kane kane ka surok.
Nalor kata u Bah Charles u la ong ruh ba watla u dei u MLA u ba don ha ka liang pyrshah hynrei ki kam pynroi ki dei ban wan namar kadei ka hok bad ka jingmyntoi jong ki paidbah. U la ithuh ruh ba ha ka jingialang la rai ba ma u lem bad baroh ki Khlieh Nongsynshar Shnong jong ka Mawrong Road Area lem bad ki san tylli ki shnong na ka Thain Mawtari Thaiang kin sa leit iakynduh ia u Myntri ka Tnad PWD Road bad kumjuh ruh ia ka Myntri ba dei Khmih ia ka tnat ka Koit ka Khiah sha Secretariat ha Nongbah Shillong.
Kumjuh na ka liang ki arngut ki nongïalam shnong kiba kynthup ia U Rangbah Shnong Syngku U Bah Klurban Shadap bad U Bah Spalton Laloo Rangbah Shnong Langsaw ha ka jingkren ki la ïathuh ba kane ka surok kala kot sha ka 25 snem tam naduh ba la ïoh ban siang bad haduh mynta kim shym la ïoh ïa kino kino ki lad ban maramot bad ka jinglong jingman jong kane ka surok ka la long kaba I sangsot bad kaba la wan rah ruh shibun ki jingeh naka bynta u paidbah uba pyndonkam ha ka leit ka wan khamtam haba kit ïa ki ba pang ba shitom.
Nalor kata ki la ong ruh ba lada ka Sorkar kumba ka la kular ban pynïoh ïa kane ka surok kaba ki paidbah ki la angnud kan dang slem bad lada ka sorkar kan dang iai leh mynthi halor kane ka mat ha ryngkat da ka jingiasngewthuh jingmut lang bad u MLA kin rai pat ban shim da kiwei ki lad ki lynti kaba kham tyngeh ban dawa pynurlong noh ïa kane ka surok.
Shuh shuh nalor ka surok bad kiwei kiwei ki mat kiba la dep ban ïathir, u bah Charles u la pynpaw ruh ba kine ki shnong ki la donkam ruh ban ïoh noh ïaka PHC kaba dei jaka ai jingsumar ia ki ba pang ba shitom namar lada ïa nujor ïaka jingbun briew jong kine ki shnong ka ladei hok ïa ki ban ïoh noh ïa ka PHC khnang ba ki paidbah jong katei la thaiñ kin suk ban phah sumar ïa ki ba pang kiba shitom.
Leave a Reply