Lur biang u Sordar bad ka KSU ia ka madan phutbol ba la kam trai da ka Bangladesh ha Lyngkhat

Syllad | The Rising MeghalayaOctober 3, 2023

Ki nongialam shnong ka Raid Lyngkhat haka Sngi U Blei bala lah sa shisien pat kila hiar biang ban lur pynmadan biang ia ka Madan Kynjat Lyngkhat kawei na ki madan ialehkai kaba pawnam bha kaba don ha syndah bad ka Bangladesh.

Ha kane ka jinglur biang ia kane ka madan la ialam khmat da u Sordar ka Raid Lyngkhat u Bah Kentli Tangsang ha ryngkat u Assistant Publicity Secretary ka KSU central body u samla Melajied Khongbuh, uba dei ruh u General Secretary KSU Nongtyngur nalor u bah Hillstar Ïawbor, Chairman ka Raid.

Ka Madan Kynjat Lyngkhat ka dei kawei na ki madan ialehkai kaba la rim bah bad kaba  pawnam bha kaba don ha khappud India-Bangladesh.

Kumban shu pynkynmaw ba katei ka madan phutbol Lyngkhat ka dei ruh kaba la pynmih ia u rang ialehkai phutbol ba pawnam u Aibor Khongjee uba mihkhmat ban iakhun na ka ri India. Hynrei kane ka madan ka la shah pynsniewdur lut bad sah shrah mynta la bun bun snem naduh ba ka sorkar ka la pyntrei  donbor da kaba pyniaid da ka surok jong ka kper sainar shiah na shiteng ki bynta jong katei ka madan phutbol Lyngkhat.

Nalor kata hadien ka jingpynjot da ka sorkar India na ka liang na ka liang ki bor napoh Bangladesh ruh ki lah wan kam trai da kaba rep ba riang bad haduh u pud ba kin ban tih syndon da ka pung dohkha katba na ka liang ki bor shipai BSF Kim nud satia ban leh eiei.

Shuh shuh nalor ba katei ka madan ka la shah pynjulor lut na ka liang ka sorkar ka la pynbeit ruh ban pynhap jubor shapoh Bangladesh. Hynrei na ka daw ka jingshimkhia ki kynhun bapher bapher khamtam ka seng KSU ban pyrshah jur ia ka jingker sainar shiah jubor kumta katei ka kam ka la shu sahteng noh.

U kyrwoh bala phah da u Melajied Khongbuh, u la ong ba kaba sngewkmen shibun ba ha ki khyndiat bnai balah dep na ka liang u sordar ka Raid Lyngkhat u lah leit lur hi ia katei ka madan wat hapdeng ka thma ktien kaba jur bad ki bor pahara BGB, ka sorkar Bangladesh. Ula ong ruh ba naka liang u sordar u la iathuh ba mynta u la ioh syndon da ka hukum ba u lah ban pyntrei suk ia katei ka surok na ki bor sorkar jong baroh arliang.