Lyngba ka Ryntih SC lah ka Jylla ban don biang iaka klob ban iakhun I-League

Syllad | The Rising MeghalayaJune 23, 2020

Ka Ryntih Sports Club, ka la nang jan ialade sha ka thong ba kan ioh ba kan iakhun ha ka lympung ialehkai jong ka I-League, bad mynta ka dang pynkhreh ban pynbit pynbiang sa ia kiwei kiwei pat ki jingdonkam (licensing criteria) kat kum ba la pruid dak ia ki da ka All India Football Federation (AIFF).

Na ka liang u bah Manbha K Khongwir Secretary ka klob ryngkat bad u bah Samran R Syiem, nongaiktien jong ka klob ki iathuh ba sa artylli pat ki klob kiba iakhun lang na ka bynta ban ioh aireng sha kane ka lympung ki long ka Sudeva FC bad Sreenidhi FC.

Ka samoi ialehkai I-League ba ka Ryntih SC lem bad artylli ki klob kiba la dep ban thong ban aireng ka dei naka bynta u snem 2021-22.

Kumban shu pynkynmaw ba naduh ka samoi kaba ka Shillong Lajong FC ka la hiar noh na ka I-League, ym shym la don shuh ki klob ialehkai na kane ka jylla kiban pyrshang ban iashim bynta ha kane ka lympung ialehkai, namar ka jia ryngkhat ba na ka liang jong ka AIFF kam shym la kren da kaba shai kdar ba ka kyrdan kaba kumno ba ka I-League kan don ha ka ri, hadien ba ka la wan ba kan mihpaw sa kawei pat ka lympung ialehkai ka Indian Super League ne ka ISL.

Kane ka dei ka jingangnud jong ka klob la bun bun ki snem bad ka kyrmen skhem ba ha kane ka kynti kba mynta kan urlong noh bad ba kan wanrah ia shibun ka jingkmen bad khamtam ia u soh uba thiang ia ka klob bad ia ka jylla hi baroh kawei.

Shuh shuh kaba sngewtynnad ban pynpaw ka long ba ka Ryntih SC ka la rai ba ka jingiashim bynta ka jong ka sha kane ka lympung ialehkai phutbol jong ka ri ka long ba kan sei madan tang da ki rang ialehkai kiba dei nangne napoh ka jylla Meghalaya, kaba long artad kum ka thong ba kan iarap ha kaban kyntiew ia la ki jong ki rang ialehkai kiba kynsai jong ka jylla.

Ka klob ka pynpaw ia ka jingsngewnguh ia ki paid nongkyrshan ba  jong ka klob bad mynta ka kynti ka Ryntih SC ka pan biang ia ka jingkyrshan kaba radbah na ki paidbah nongshnong ka jylla, kumba ki la juh iarap ban kyrshan ha ka por ba la iakhun ia ka SPL ha u snem 2019 ba kin ia mih ryntih lang shriak ban iarap ban  ai mynsiem ia ka klob ha ka por ba kan iakhun pat ha ka I-League.